Монголын төрд гайгүй тоглолт үзүүлдэг энэ эрхмийн ээлжит бай шүүх засаглал болж хувирав. Ийм тэмцэл өрнүүлэхэд олон зүйл нөлөөлсөн нь мэдээж. Юуны өмнө ХХААХҮ-ийн сайд Х.Баттулгаас уучлал гуй гэж шүүхийн шийдвэр гараад байгаа. Дээр нь УИХ-ын дэд дарга Л.Цог, УИХ-ын гишүүн З.Баянсэлэнгэ хоёр АТГ-т өгч шалгуулахаар болсон. Харин өөрөө Х.Баттулгаас уучлал гуйхгүй гэж гүрийгээд байгаа. Тиймээс Улсын дээд шүүхэд давж заалдах гэж буйгаа зарлалаа. Энэ тухай ярихдаа “Чингэлтэй дүүргийн шүүх, хотын шүүх ямар шийдвэр гаргах вэ гэдгийг би мэдэж байсан. Би энэ үйлдлээрээ Монголын шүүх хэн болсныг ард түмэнд ойлгуулах гэж шүүхээр жаахан тоглож байгаа юм” хэмээн хэлсэн. Тэр үндсэндээ шүүх засаглалыг захиалгат шийдвэр гаргадаг болсон гэсэн санааг илэрхийллээ. Харин УИХ-ын гишүүн, өмнө хууль зүйн салбарыг хариуцаж явсан эрхэм шүүхээр тоглож байгаагаа зарлах хир зохимжтой вэ гэдэг нь нилээд том асуудал үүсгэнэ. Магадгүй шүүхийн салбарынхан энэхүү хэлсэн үгээр нь ч асуудал үүсгэж ч болно. Ер нь шүүхээр тоглож болох уу? Хэн ч тоглож болохгүй гэж хэлэх л байх. Харин Ц.Нямдорж гишүүн муур хулгана болж тоглоод байгаа аж.

    Өөрийнх нь нэгэн цагт биш нилээд олон удаа тэргүүлж байсан хууль зүйн салбар одоо Ц.Нямдоржийн эсрэг зогсчихсон. Түүний үед олон томоохон хэрэгүүд дарагдан өнгөрсөн гэж шүүмжлүүлэх боллоо. Тэр бас одоогийн хууль зүйн салбарын удирдлагынхаа эсрэг хүчтэй дуугардаг. Түүний зарим нэгэн шүүмжлэл ч үнэний ортойг үгүйсгэж болохгүй. Тухайлбал сүүлийн үед ХЗдХ-ийн сайд Х.Тэмүүжин томоохон хэргүүдийг зарладаг болсон. Энэ талаар Ц.Нямдорж “Хэрэг бүртгэх, мөрдөн байцаах үйл ажиллагаанд Хууль зүйн сайд оролцдоггүй. Таслан зогсоодог эрхийг прокурор эдэлдэг. Хууль зүйн сайд хэрэг шалгаж, мэдээлэл гадагшаа гаргадаггүй. Хэргийн талаарх мэдээллийг зөвхөн мөрдөн байцаагчийн зөвшөөрлөөр гадагшаа гаргана гэсэн хуулийн үг байдаг” хэмээн тайлбарлаад байгаа.

    Ц.Нямдоржийн өөр нэгэн тайлбар ихээхэн анхаарал татаж эхэллээ. Тэрээр “Би 1990 оноос хойш хууль зүйн салбарт ажиллаж байгаа. Тэгэхэд би хавтаст хэрэг бариад Хууль зүйн яам, Төрийн ордон руу ордог прокурор харж байгаагүй” гэсэн. Миний үед асуудал ном журамаараа явж байсан гэж хэлэх гээд байна уу? Эсвэл одоо ийм прокурор байна гэж хэлээд байна уу? Энэ маш ээдрээтэй тайлал аж. Хэрэв үнэхээр хавтаст хэрэг сугавчлаад төрийн ордон гүйдэг тийм прокурор байгаа бол хэн байж болох вэ гэсэн хардлага үүсч байна. Ц.Нямдорж хэнийг хэлээд байна. Өөрөө тийм хүнийг харсан уу гээд хардаж болох асуудал мөн л дөө.

    Улс төрийн салбарт үргэлж дуулиан шуугиан дэгдээж явдаг Ц.Нямдорж энэ удаа шүүхээр тоглож байгаагаа зарлалаа. Энэ мэдээж нэг хэсэгтээ олон хүний ярианы сэдэв болно. Үүний зэрэгцээ өмнө Х.Тэмүүжин Хууль зүйн сайд Ц.Нямдоржийг шүүмжилдэг байсан. Харин одоо Ц.Нямдорж Хууль зүйн сайд Х.Тэмүүжинг шүүмжилдэг боллоо. Энэ хоёр эрхмийн байрлал солигдсон ч шүүмжлэл тасрахгүй харин ч эрчимжих шинжиндээ орлоо.