Эрүүл мэндийн сайд асан Н.Хүрэлбаатарыг мөнгө угаасан, хээл хахууль авсан гэх хэргээр УМБГ-аас шалгаж эхэлсэн. Тэрээр өнгөрсөн дөрөвдүгээр сарын 11-нд хил давсан учраас Интерполоор эрэн сурвалжлуулах хүсэлт тавьсан гэдгийг ЦЕГ-ын хэлтсийн дарга, хурандаа Т.Сайнжаргал мэдэгдсэн байгаа.  Тэгвэл Н.Хүрэлбаатарын шавь гэх хоёр хүн өчигдөр хэвлэлийн хурал гэнэт зарласан юм.  Яаран сандран хийсэн эл хэвлэлийн хурлаас өмнө Н.Хүрэлбаатарыг өнөөдөр эх орондоо ирнэ гэдгийг хууль хяналтынхан мэдэж байсан гэх яриа ч байгаа юм.

Ямартаа ч Анагаах ухааны доктор Л.Баттөр, Б.Дамдиндорж гэж өөрсдийгөө танилцуулсан шавь нар нь түүний хүсэлтээр өөрийнх нь мэдэгдлийг дамжуулсаныг нь дахин сануулахад,   "Хууль,хяналт болон цагдаагийн байгууллагаас намайг ямар нэг хэрэгт холбогдуулан албан ёсоор дуудсан зүйл өчигдөрийг хүртэл байсангүй. Хэрвээ  намайг  эрэн сурвалжилж байсан бол надад болон  манай гэр бүлийнхэнд энэ тухай албан ёсоор мэдэгдэх ёстой. Гэтэл өчигдөр Цагдаагийн ерөнхий газраас намайг эрэн сурвалжилж байгаа тухай хэвлэл, мэдээллийнхэнд мэдэгдсэн байна. Ийм учраас миний бие цагдаагийн газраас өчигдөр хийсэн мэдээллийг хүлээн авч, эндэх ажлаа орхин маргааш /өнөөдөр/  эх орондоо очихоор боллоо. Миний бие ямар нэг хэрэгт холбогдож, Монгол Улсын хууль зөрчсөний улмаас гадаад улс руу яваагүй бөгөөд Сингапур улсад болсон “Ахмад настанд эрүүл мэндийн тусламж үйлчилгээг чанартай хүргэх нь” сэдэвт олон улсын хуралд илтгэл тавин оролцож, Сингапур, Гонконг, Малайз зэрэг улсуудад ахмад настнуудын эрүүл мэндийн болон нийгмийн асуудалыг хэрхэн шийдвэрлэж байгаа талаар газар дээр нь биечлэн танилцаж, судласан юм" гэв.

 Тэгэхээр Н.Хүрэлбаатар өөрийг нь эрэн сурвалжилж байгааг мэдээгүй. Мэдсэн даруйдаа эх орондоо очихоор болсон утгатай захидлыг шавь нараараа дайсан нь олон түмний гайхшралыг төрүүлээд байгаа юм.  Гэтэл түүний хүү Н.Энхбат болон найз охин Б.Болортуяа  нарыг баривчилсан гэх мэдээллийг цагдаагийн байгууллагаас өгсөн.  Мөн хэвлэл мэдээллийн хэрэгслээр удаа дараа түүний талаар бичигдэж, яригдаж байсан. Түүнчлэн олон улсын Интерполийн шугамаар хүртэл хайгдаад эхэлсэн байж  тэрээр мэдээгүй  байгаа нь сонин юм.
 
Нөгөөтэйгүүр түүнийг онгоцноос буунгуут баривчлахаар төлөвлөсөн гэх ШУМ  аль хэдийн цуураад эхэлжээ.