УИХ-ын гишүүн Ё.Отгонбаярын эхнэр С.Эрдэнэсолонгийг асар их хэмжээний мөнгө угаасан гэх хэргээр цагдан хориод байгаа. Харин эхнэрээ цагдан хоригдсныг хөдөө явж байгаад мэдээгүй гэх Ё.Отгонбаярын яриа ЦЕГ-ынхы ярианаас тэс ондоо зөрж байна. Цагдаагийнхан түүний эхнэр 323 сая ам.доллар буюу 13,9 тэрбум төгрөг дөрвөн жилийн хугацаанд дансандаа байршуулсан гэж үзэж байгаа бол гишүүний эхнэр өөрөө хувийн бизнестэй ч нэг сая доллар ч гартаа барьж үзээгүй гэлээ.  Цагдаагийн байгууллага энэ нь үнэн хэмээн дахин дахин нотлон ярисаар байгаа ч иргэд мөнгөний тооноос болж нэг л итгэж өгөхгүй байна. Хуулийнхан Н.Энхбаярыг баривчлахдаа ихээхэн том алдаа хийсэн шигээ Ё.Отгонбаярын эхнэрийг хорихдоо ч бас багагүй буруу үйлдэл хийсэн гэж яригдаж эхэллээ.

    Юуны өмнө Ё.Отгонбаярын эхнэрийг хорьсон тухай хэвлэлийн бага хурлыг цагдаагийнхан 16 цагийн үед хийсэн байдаг. Гэтэл Ё.Отгонбаярын гэргийг 21 цагийн үед 461-р ангид аваачсан аж. Тэгэхээр энэ хооронд хаана байлгасан бэ? Бараг баривчлахаасаа өмнө хэвлэлийн бага хурал хийсэн юм биш үү? Яагаад яаран сандран хэвлэлийн бага хурлыг өдөрт нь хэдхэн цагийн зөрүүтэй хийсэн бэ? Мөн уг асуудлын талаар хэвлэлийн бага хурал хийхдээ монгол төгрөгийг ам доллараар андуурч хэлсэн үү? Түүнээс болоод нийгмийг хамарсан дуулиан дэгдээд байна. Үүнтэй хамтатган ЭМ-ийн сайд асан Н.Хүрэлбаатарын эрэн сурвалжилахаар болсон гэж цагдаагийнхан зарласан. Гэтэл Н.Хүрэлбаатар нь хэзээ ч намайг дуудаагүй. Намайг шалгах талаараа ядаж манай ар гэрийнхэнд мэдэгдэж болно. Ийм байтал эрэн сурвалжилж эхэлсэн гэж зарлалаа. Би зугтаагүй. Өөрөө яваад очье хэмээн үгээ дайлгажээ. Энэ бүхэн үнэн бол дахиад л хуулийн байгууллагынхан яаж ажилладагийг ард түмэн харлаа. Бас араасаа олон асуудлуудыг дагуулах нь гарцаагүй боллоо.

   УИХ-ын гишүүн Ё.Отгонбаярын эхнэрээ хууль бусаар барьчилсан гэж үзсэн учираас шүүхэд ханджээ. Учир нь хуулийн хүрээнд сэжигтнээр тооцсон бол эхлээд мэдэгдэх ёстой байдаг аж. Мэдүүлэг тайлбарууд ч авдаг. Гэтэл Ё.Отгонбаярын эхнэрийг хуурч мэхлэх замаар дуудаад, яваад очихоор нь шууд баривчилчихсан бололтой юм. Гэтэл хуулинд баривчлах ажиллагааг “оргон зайлахыг завдсан, мөрдөн байцаах  ажиллагаанд саад учруулсан, мэдүүлэг өгөхгүй байсан тохиолдолд баривчлана” гэж заасан байдаг аж. Тийм ч учраас Ё.Отгонбаярт хууль бус баривчилгаа гэсэн тоглолт хийх боломжийг хуулийнхан өөрсдөө бүрдүүлээд өгсөн байна. Бас мөнгөний дүнг буруу хэлсэн талаар  Ё.Отгонбаяр “300 сая ам.доллар гэдэг бол улсын төсөвтэй тэнцэхүйц мөнгө шүү дээ. Хувь хүний дансаар орж гарна гэдэг бол байж боломгүй зүйл. Хэрэв төгрөгийг ам.доллартай андуурсан бол би үнэхээр гомдолтой байна. Нэг албан тушаалтан мөнгөн дүнг андуурч хэлсний төлөө бусдыг хорьж, цагдана гэдэг бол байж болохгүй зүйл” гэсэн. Энэ гомдол эхнээсээ маш том улс төрийн асуудал болон хувирч эхэллээ.
 
   Тэрбээр хэдэн өдөр хэвлэлээр нүдүүлсний эцэст “Миний хань ийм менге ч мэдэхгvй гэдгийг баттай хэлж чадна. Шалгаад тогтооно биз ээ. Харин ийм цагт элдвээр давшилж буй нь ичээрэй. Сонгуулийн золиос болгочих вий” хэмээн захижээ.

   Ё.Отгонбаярын эхнэр аялал жуулчлалын чиглэлээр бизнес эрхэлдэг, тэдний гэр бүлийн хадгаламжинд 300 сая төгрөг л байдаг гэж өчжээ. Түүнд эхнэртэйгээ уулзах зөвшөөрөл одоо хүртэл өгөөгүй байгаа юм. Хэрэв хуулийнхан иргэдийн эргэлзэж байгаа шиг, Ё.Отгонбаярын өчиж байгаа шиг андуурч, эндүүрсэн байвал өөрсдөө эргээд томоос том нүхэнд унах вий.