Өнөөдрийн УИХ-ын чуулган завсарлалаа. Чуулганаар Чингис бондын зарцуулалт болон бусад цаг үеийн асуудлаар Ерөнхий сайд Н.Алтанхуяг гишүүдэд мэдээлэл өгөх байсан ч гол сэдэв нь Ё.Отгонбаяр гишүүний эхнэрийн хэрэг байлаа.

  МАН-ын гишүүд асуулт асуух бүрдээ О.Эрдэнэсолонгын дансан дахь мөнгө төгрөг байсан уу, доллар байсан уу гэдгийг тодруулж, холбогдох албаны хүмүүсийг дуудахыг шаардсан юм. Учир нь Ерөнхий сайд Н.Алтанхуяг "Би мэдэхгүй. Холбогдох албаны хүмүүсээс нь асуу" гэсэн юм.

  УИХ-ын гишүүн Д.Оюунхорол "Та бол ЦЕГ-ын даргыг томилсон хүн. Нэг хүнийг учир утга нь олдохгүй байгаа асуудлаар хорьчихоод байхад надад хамаагүй гэж хэлмээргүй байна. Хууль зүйн сайд, цагдаагийн даргаа дуудах хэрэгтэй. Ийм эрх танд байгаа тул хүндэтгээд энэ хүсэлтийг биелүүлж өгнө үү. Үнэхээр гэм буруугүй байвал тэр хүнийг нэг цагийн өмнө ч гэсэн сулламаар байна. Сонгууль болж байхад төр, иргэдийн хооронд сэв суулгах юм битгий хийгээрэй" гэж тайлбар шаардсан юм.

  Харин үдээс хойшхи хуралдаан эхэлснээс хойш МАН-ын гишүүдийн энэ асуултанд ээрүүлсэн Н.Алтанхуяг сайд хариу хэлсэнгүй. УИХ-ын дарга З.Энхболд "Ерөнхий сайд энэ асуултанд түрүүн хариулсан. Танхимд хэрэг ярьдаггүй гэдгийг Ц.Нямдорж гишүүнээс асуу. Үнэхээр тийм байгаа бол явдаг газраараа явна" гэж амыг нь таглаж орхив.

   Ийнхүү Ё.Отгонбаяр гишүүний эхнэрийн асуудлыг тодорхой болгох гэсэн МАН-ын гишүүд Ерөнхий сайдын амнаас үг унагаж чадсангүй чуулган өндөрлөлөө.