Монгол Улсын Батлан хамгаалах яамны Төрийн нарийн бичгийн дарга, хошууч генерал З.Болдбаатар тэргүүтэй БХЯ, ЗХЖШ-ын төлөөлөгчид ХБНГУ-д болж буй Монгол Улсын Батлан хамгаалах яам, ХБНГУ-ын Холбооны Батлан хамгаалах яам хоорондын 10 дугаар зөвлөлдөх уулзалтад оролцож байна. Зөвлөлдөх уулзалтын хүрээнд Монгол Улсын БХЯ-ны Төрийн нарийн бичгийн дарга хошууч генерал З.Болдбаатар ХБНГУ-ын ХБХЯ-ны Төрийн нарийн бичгийн дарга Р.Вольфтой энэ сарын 10-ны өдөр ХБХЯ-нд уулзалт хийлээ. Уулзалтад Монгол Улсаас ХБНГУ-д суугаа Онц бөгөөд Бүрэн эрхт Элчин сайд Б.Даваадорж, БХЯ-ны Гадаад хамтын ажиллагааны газрын дарга, хурандаа Д.Ариунболд, ЗХЖШ-ын Ажиллагааны Удирдлагын газрын дарга, бригадын генерал Ж.Бадамбазар, Монгол Улсаас ХБНГУ-д суугаа ЭСЯ-ны дэргэдэх цэргийн атташе, дэд хурандаа Д.Эрдэнэбилэг нар оролцлоо.Хоёр орны БХЯ-дын Төрийн нарийн бичгийн дарга нар хоёр орны иж бүрэн түншлэлийн харилцааны хүрээнд эрчимтэй хөгжиж буй Батлан хамгаалах салбар хоорондын харилцаа, хамтын ажиллагааны асуудлаар харилцан санал, мэдээлэл солилцож, энхийг сахиулах ажиллагаа, цэргийн сургалт, бэлтгэл зэрэг тодорхой асуудлуудаар Батлан хамгаалах салбарын харилцаа, хамтын ажиллагаагаа эрчимжүүлж, хөгжүүлэхээр тохиролцов.
Дэлхий нийтийн энх тайван тогтвортой байдлын төлөөх, тухайлбал Афганистан Улсад явагдаж буй эвслийн цэргийн ажиллагаанд Монгол-Германы цэргүүд хамтран 2009 оны 12 дугаар сараас эхлэн өнөөг хүртэл ажиллагааны хүнд нөхцөлд тавигдсан үүргээ хамтран амжилттай гүйцэтгэж буйд талууд сэтгэл өндөр байгаагаа энэхүү уулзалтын үеэр харилцан илэрхийлэв.
