УИХ-ын гишүүн Ё.Отгонбаяр Чогной гэгч бизнесменийг сүрдүүлж, авлига авах гэсэн хэрэгт холбогдоод байгаа билээ. Энэ хэргийг шалгах явцад эхнэрийнх нь дансны гүйлгээнээс илэрсэн их хэмжээний мөнгө ч давхар асуудалд оруулаад байгаа. Үнэхээр Ё.Отгонбаяр авлига авах гэж оролдсон уу, эхнэр нь их хэмжээний мөнгө угаах хэрэгт нь оролцсон уу? гэсэн асуултыг тэрбээр үгүйсгэсээр байгаа. Харин хуулийнхан баттай нотолгоо байгаа гэж мэдэгдсээр байна. Улс төрд шуугиан тарьсан энэ үйл явдлын учиг тайлагдаагүй байгаа ч Ё.Отгонбаярыг хуулийнхан шалгах нь мэдээж. Түүнийг шалгаж, мэдүүлэг авах гэхээр УИХ-ын гишүүн тул бүрэн эрхэд нь халдаж болохгүй байна хэмээн хуулийнхан гомдоллож байгаа. Дээр нь Ерөнхийлөгчийн сонгуулийн үе таарч УИХ-ын чуулган түр завсарласан учир Ё.Отгонбаярын гишүүний эрхийг түдгэлзүүлэх асуудлыг хойш чангаагаад байна.

   Тэрбээр энэ дуулиан шуугиан, эхнэрийг нь цагдан хорьсон хэрэгт бухимдахдаа өөрөө мэдүүлэг өгөхөд бэлэн байгаагаа мэдэгдсээр байгаа. Гэсэн ч ингэж сэтгэлийн хөдөлгөөнөөр бүрэн эрхээсээ татгалзах нь намд нь гарз хохиролтой учир намын удирдалгуудын хэмжээнд хэлэлцэж байж шийднэ гэсэн янзтай хүлээж байгаа аж.

   Нэгэнт хуулийнхан түүнийг хэрэгт холбогдсон баттай баримт байгаа гэж мэдэгдсэн болохоор Ё.Отгонбаяр өөрөө татгалзахгүй байсан ч УИХ-ын чуулганаар эрхийг нь түдгэлзүүлэх магадлал өндөр.

  Харин сонирхол татаж байгаа нь Булган аймгаас сонгогдсон түүний араас АН-аас тус аймагт өрсөлдсөн Д.Түмэнжаргал гэгч анаад хүлээж байна. Тэрбээр 2012 оны сонгуулиар Ё.Отгонбаяртай өрсөлдөж ялагдсан бөгөөд 28,95 хувийн санал авчээ. Харин Ё.Отгонбаяр 46,35 хувийн санал авсан юм. Тиймээс Ё.Отгонбаярын бүрэн эрхийг түдгэлзүүлбэл Д.Түмэнжаргал хуулийн дагуу УИХ-ын гишүүн болох юм.

Д.Түмэнжаргал нь АН-ын Үндэсний зөвлөлдөх хорооны гишүүн, Гүйцэтгэх хорооны гишүүн. “Үндэсний үнэт цаас” ХХК-ны ерөнхий захирал, “ТМ” телевизийн үндсэн хөрөнгө оруулагч. Олон улсын худалдааны эдийн засагч мэргэжилтэй, Худалдаа үйлдвэрийн яам, Гадаад харилцааны яаманд мэргэжилтнээр ажиллаж байжээ.

  Ийнхүү Ё.Отгонбаярын хэрэгт хуулийнхнаас гадна АН-ынхан анхаарал тавих болжээ. Ё.Отгонбаяр “өвдөг шороодвол” АН суудлын тоогоо нэмэх тул МАН-ынхан "буруу эргэсэн" гишүүндээ сайтар анхаарал тавихаас аргагүй болж байна.