ЗГХЭГ-ын дэд дарга Г.Дэнзэнг ажлаа өгсөн талаар Ерөнхий сайд Н.Алтанхуяг дөнгөж сая сэтгүүлчдэд мэдээлэл хийхдээ мэдэгдлээ.

  Г.Дэнзэн төсвийн мөнгөөр өөрийн хамаатан саднуудаа Германд аялуулсан баримт дэлгэгдэж мөн Ерөнхий сайд Н.Алтанхуягийн оролцоотойгоор "Эрдэнэс Тавантолгой"-н 17 тэрбум төгрөгийн тендерийг авсан гэх мэдээлэл гараад байсан. Төрийн албан хаагчдын нэрний оронд хамаатнуудаа явуулсан түүнд ямар нэгэн арга хэмжээ авч, хуулийн байгууллагаар шалгуулахыг МАН-ын гишүүд шаардсан юм.

Г.Дэнзэн "Эрдэнэс Таван толгой"-н тендерт ямар ч хамаагүй гэдгээ хэвлэлийн хурал зарласан ч түүнд итгэх хүн цөөхөн байсан юм. Харин хамаатнуудаа гадаадад зугаалуулж, татвар төлөгчдийн мөнгөөр найрласан нь баримттайгаар илэрсэн билээ.

   Өнгөрсөн долоо хоногт түүний эгч Г.Одонгэрэл “Эрдэнэс-Тавантолгой” ХK-ийн Ханган нийлүүлэлтийн газарт ахлах мэргэжилтнээр ажиллаж байсан ч ажлаас гарах өргөдлөө өгсөн юм. Г.Дэнзэнг эгчийгээ ийм албанд томиллоо гэж шүүмжилсэн учир тэрбээр дүүгийнхээ ажлыг бодоод ажлаасаа гарсан гэж эх сурвалж мэдээлсэн юм.