Монголын шинэ үеийн залуусын дунд домог шахуу болсон нэгэн этгээд бий. Тэрээр 17 тэрбумын тендерийг хамтран амьдрагчийнхаа хамт авч чадсан гэсэн сөрөг хүчний нотолгоогоор олны анхаарлыг татах болсон. Бас “Шинэ баян цээж өвчтэй” гэдэг шиг хандлага харьцаагаараа ч зартай гэж саарал ордныхон ярих юм билээ. Тэрээр хүргэн ах Ерөнхий сайдынхаа далбаан дор ихээхэн дарцаглаж УИХ-ын цөөнгүй гишүүдийн анхаарлын төвд орсон юм. Эцэстээ бүр улсын Ерөнхийлөгчөөр хэлүүлж байж ажлаа өгсөн энэ хүн бол ЗГХЭГ-ын дэд дарга  Г.Дэнзэн юм.

    Түүнийг өчигдөр сайн дураараа ажлаа өгсөн гэдгийг Ерөнхий сайд орон даяар зарлав. Магадгүй энэ зарыг л хэлэх нь ээлжит уулзалтын нэг том зорилго байсан байх гэдэг нь анзаарагдсан.

    Үүнээс хэдхэн хоногийн өмнө “Эрдэнэс Тавантолгой” ХK-д ахлах мэргэжилтнээр ажилд орсон Г.Дэнзэнгийн төрсөн эгч Г.Одонгэрэл ажлаа өгөх хүсэлтээ гаргасан гэж яригдсан. Тэгвэл энэ үйл явдлаас хэдхэн хоногийн дараа Г.Дэнзэн ч бас албаа өглөө. Энэхүү үйл явдлын талаар ихээхэн зөрүүтэй хоёр эх сурвалж манайд мэдээлэл өглөө. Эхний эх сурвалжийн тайлбараар бол Ерөнхийлөгч шахсан учраас ажлаа өгөхөөс өөр аргагүй байсан гэнэ. Ийм шахалтаар ажлаа өгсөн бол удахгүй сонгуулийн дараа томоохон ажилд томилогдоно. Эсвэл гадаадад нэр хүнд бүхий дээд сургуульд сурах тохироотойгоор албаа сайн дураараа өгсөн гэв.

    Харин хоёр дахь эх сурвалжийн мэдээлж байгаагаар бол залуухан дарга Н.Алтанхуяг ахтайгаа түнжин хагарч эхэлжээ. Тиймээс л зам мөрөө хөөх хүсэлтэй болсон. Эгч нь эхлээд дараа нь өөрөө ажлаа өгсөн. Цаашид Н.Алтанхуяг, Г.Дэнзэн хоёрын зам мөр нийлэх биш нилээд холуур салах болно. Магадгүй Г.Дэнзэн хамгийн сүүлд хэвлэлийн бага хурал хийхдээ “Н.Алтанхуягтай би сүүлийн жилүүдэд хамтран ажиллаж ирлээ. Н.Алтанхуягийг Ерөнхий сайд болчихно гэж бодоогүй” гэх мэт хүйтэн хөндий үгнээс нь дарга цэрэг хоёрын, хүргэн хадамуудын зам салаалж буйг төвөггүй ойлгож болохоор байсан юм.

    Ерөнхий сайд Н.Алтанхуяг 17 тэрбумын тендер авах гэж байгаад гэмгүй залуугийн хувь заяагаар тоглочихлоо гэж ярих иргэд ч байна. Уг нь Н.Алтанхуяг УИХ-ын чуулганы танхимын индэр дээрээс хүргэнээ ихээхэн магтаж “Би Г.Дэнзэнг УБИС-д багшилж байхад нь авчирсан. Гол нь Оюутолгой болоод Тавантолгойн ТЭЗҮ-г хийлгэх гэж авчирсан” гэсэн утгатай юм ярьсан. УИХ-ын чуулганы хүндэт индэрээс ингэж хүргэнээ магтсан тохиолдол парламентын түүхэнд л лав байхгүй байх. Харин хэргийн эзэн Г.Дэнзэн өөрийнх нь эсрэг зүйлсийн талаар “Миний хувьд Засгийн газрын Хэрэг эрхлэх газрын Хяналт шалгалт, дотоод аудитын газрыг хариуцан ажилладаг. Ажил авснаас хойш 300 ортой төрөх эмнэлгийн асуудал, Эрүүл мэндийн яамны Төрийн нарийн бичгийн даргын асуудал, Иргэний нисэхийн ерөнхий газар, Татвар, Гааль, Ашигт малтмалын газруудад хийсэн хяналт шалгалтыг хариуцан хийсэн. Зохих хэргүүд нь илрээд, холбогдох хүмүүс нь хариуцлагаа хүлээсэн байгаа. Миний хувьд эдгээр шалгалттай холбогдуулан Засгийн газрын Хэрэг эрхлэх газар руу чиглэсэн зохион байгуулалттай гүтгэлэг гэж хүлээж авч байна” хэмээн тайлбарлаж байсан юм.

    Ийнхүү олон түмний анхаарлыг татсан эхний хүн ажлаа өглөө. Хэрэв эхний тайлбар үнэн бол тэр гадаад явах байх эсвэл том ажилд томилогдож залуусыг бас л атаархуулна. Харин хоёр дахь тайлбар үнэний хувьтай бол Н.Алтанхуяг ахаасаа зайгаа бариад зогсохгүй улс төрийг бүр мөсөн орхиж ч мэдэх юм. Н.Алтанхуяг гэмгүй залууг хөтөлж авчираад гэмтэн болгоод ийм эгзэгтэй сонголтын аль нэгийг хийлгэсэн болж таарна. Удахгүй аль нь вэ гэдэг нь ч харагдана.