Бүгд Найрамдах Чех Улсын Прага хотын цагаар өглөөний 7.10 цагт тус улсад суугаа Монголын ЭСЯ-ны байранд Ерөнхийлөгчийн сонгуулийн 22 дугаар салбар комиссын санал авах ажиллагаа эхэлсэн байна. 22 дугаар салбар комиссын дарга Д.Зүмбэрэллхам Чехт ажиллаж, амьдарч буй иргэдийн төлөөллийг байлцуулан саналын хайрцгийг нээж, шалган битүүмжилж лацадлаа.Ерөнхийлөгчийн сонгуулийн энэхүү 22 дугаар салбар комисст 107 хүн санал өгөхөөр бүртгүүлсэн бөгөөд иргэн Ц.Балт 7.15 цагт саналаа өгч, салхийг нь хагалав. Прагаас 110 км-ийн зайтай байдаг Хардец хотоос Т.Ариунжаргал зориуд ЭСЯ-аа зорьж ирэн саналаа өгсөн нь алс холын Чех Улсад суугаа монголчуудын дотор цөөнгүй хүмүүс улс орныхоо хувь заяанд ихээхэн санаа тавьж байдгийн жишээг ийнхүү иргэн Т.Ариунжаргал харуулав. Өглөөний 11 цагийн байдлаар 7 хүн саналаа өгөөд байна.
Мөн Монгол улсын Ерөнхийлөгчийн сонгуулийн Москва хот дахь салбар комиссийн 18-р хэсэгт санал хураах ажил 6 дугаар сарын 14-ний өглөөний 07-н цагт эхэллээ. Монгол улсын хэргийг ОХУ-д түр хамаарагч С.Банзрагч санал хураалтын нээлт дээр хэлсэн үгэндээ, гадаад улсуудад амьдран суугаа Монгол улсын иргэд 2012 оны УИХ-ын сонгуулиас эхлэн сонгох эрхээ эдэлдэг болсон билээ. Өнгөрсөн жил болсон УИХ-ын сонгуульд Москва хотод амьдардаг 141 хүн бүртгэгдэж байснаас 86% нь саналаа өгч байсан бол энэ жил болж байгаа Монгол улсын Ерөнхийлөгчийг сонгох сонгуульд саналаа өгөхөөр 215 хүн бүртгэгдээд байгаа нь манай иргэд сонгуулийн үйл ажиллагаанд идэвхитэй оролцож байгаагийн илрэл мөн гэж онцлон тэмдэглэлээ.
Санал хураалтын нээлтийн ажиллагаанд сонгуулийн салбар комиссийн гишүүд, ЭСЯ-ны ажилтнууд болон сонгогчдыг төлөөлөл оролцон саналаа өглөө. Өдрийн 12 цагийн байдлаар 41 хүн буюу нийт бүртгэгдсэн сонгогчдын 20,5% нь саналаа өгөөд байна.
Бүгд Найрамдах Түрк Улсад суугаа иргэд мөн саналаа өгч эхэлсэн бөгөөд Анкара дахь салбар комисст нийт 97 хүн бүртгүүлж, Улаанбаатарын цагаар 19 цагийн байдлаар нийт 19 хүн саналаа өгөөд байна.
