УИХ-ын гишүүн С.Бямбацогт “ХӨГЖЛИЙН БОДЛОГО ТӨЛӨВЛӨЛТИЙГ БОЛОВСРОНГУЙ БОЛГОХ ТУХАЙ” Улсын Их Хурлын тогтоолын төсөлд санал авахаар Засгийн газарт хүргүүллээ. Тогтоолын төсөлд Үндэсний хэмжээнд болон бүс, орон нутаг, салбарын чиглэлээр удаан хугацаанд мөрдөгдөхөөр батлагдсан хөтөлбөрийн баримт бичгүүд нь Засгийн газрын мөрийн хөтөлбөр, улсын төсөв, эдийн засаг, нийгмийг хөгжүүлэх Үндсэн чиглэл болон салбарын бодлоготой уялдаж байгаад шинжилгээ хийж, дүгнэлт гарган, Монгол Улсын нийгмийн хөгжлийн хүрсэн төвшин, ажиллах хүчний болон байгалийн нөөц, гадаад, дотоод хүчин зүйлийг тооцсоны үндсэн дээр стратегийн зорилтуудыг хэрэгжүүлэхэд чиглэсэн дунд хугацааны бодлогын баримт бичиг,  зорилтот хөтөлбөр, төслүүдийн жагсаалт, Улсын Их Хурлын бусад шийдвэрийн төслийг боловсруулан Улсын Их Хурлын 2013 оны намрын ээлжит чуулганы хугацаанд багтаан танилцуулах зэрэг асуудлыг тусгажээ.
    Сонгууль бүрийн дараа байгуулагдсан Засгийн газар өмнө нь батлагдсан бодлогын баримт бичгийг үргэлжлүүлэн хэрэгжүүлэхгүй байгаагаас хөгжлийн бодлого, төлөвлөлтийн тогтвортой байдал, залгамж холбоо алдагдаж, энэ нь орон нутгийн удирдлагын түвшинд ч нэгэн адил байна. Алийн болгон улс төржиж, бусдын явуулж байсан нь буруу гээд орхидог, өөрийнх зөв гээд шинээр эхэлдэг байх вэ.
    Хэрвээ дээрх тогтоолын төсөл батлагдвал улс орны эдийн засгийн хөгжлийг түртгэтгэх, тогтвортой хөгжлийг хангах, салбар, бүс нутаг, байгалийн баялгийн болон ажиллах хүчний нөөц, орон нутгийн хөгжлийн бодлоготой уялдсан хөгжлийн нэгдсэн  бодлоготой байх эрх зүйн орчинтой болох нөхцөл бүрдэнэ гэж төсөл санаачлагч С.Бямбацогт гишүүн үзэж байгаа ажээ.