Дээд шүүх иргэдийн саналыг авч байна Улсын Дээд шүүх твиттер болон facebooк хуудсаараа дамжуулан шүүн таслах болон захиргааны үйл ажиллагааны талаар олон нийтэд мэдээлэн тэдний санал бодлыг авч эхэллээ. Мөн Мэдээлэл лавлагааны албандаа санал хүсэлтийн хайрцаг байрлуулан иргэдийн саналыг бичгэн хэлбэрээр ч авч байгаа аж. Шүүхийн захиргааны тухай хуулийн 12 дугаар зүйлийн 12.1.6-д шүүхийн үйл ажиллагааны талаар олон нийтийн саналыг бичгээр болон цахим хэлбэрээр авах ажлыг шүүхийн тамгын газар зохион байгуулахаар заажээ. Энэ дагуу дээрх ажлыг зохион байгуулж байгаа юм байна. Тус шүүхийн www.facebook.com/mncourt, www.twitter.com/mncourt цахим хаягуудаар орж, иргэд өөрсдийн санал бодлоо илэрхийлэх боломжтой аж. Дашрамд дурдахад Улсын Дээд шүүхийн твиттер хуудаснаас тус шүүхээр хяналтын шатны журмаар хэлэлцэгдэх хэргийн зарын талаарх мэдээллийг авч болох юм байна. Улсын Дээд шүүхийн түүхэн замналаас эхлээд бусад мэдээллийг ч мөн дээрх хаягуудад байршуулжээ.