АН-ын гишүүд дэмжигчдийн холбооноос өнөөдөр мэдээлэл хийлээ. Тэд ерөнхийлөгчийн сонгуультай холбогдох мэдэгдлийг МАХН, МАН-аас Ерөнхийлөгчийн сонгуульд нэр дэвшиж байгаа Н.Удвал, Б.Бат-Эрдэнэ болон намын удирдлагуудад хүргүүлж байгаа юм байна.

Тус мэдэгдэлд “2008 оны долдугаар сарын 1-ны эмгэнэлт хар өдрийн түүхэн сургамжийг эргэн санаж, МАН-ын нэр дэвшигч Б.Бат-Эрдэнэ, МАХН-ын нэр дэвшигч Н.Удвал болон МАН, МАХН-ын удирдлагуудад хандан Монгол улсын Ерөнхийлөгчийн сонгуулийн санал хураах 2013 оны зургадугаар сарын 26-ны өдрөөс хойш иргэдийг улс төрийн бохир үйлдэлд татан оролцуулах, улс төрийн үзэл бодлоор нь хагаралдуулан хуваах, хэт улс төржин турхирсан аливаа үйлдэл гаргахгүй байхыг хариуцлагатайгаар мэдэгдье” гэжээ.

Мөн цаашид Монгол улсын Ерөнхийлөгчийн сонгуульд ялалт байгуулсан Монгол улсын Ерөнхийлөгч хууль санаачлах эрхийнхээ хүрээнд  эрх зүйн орчинг бүрдүүлж, сонгуулийн одоогийн системийг өөрчлөж, бүх шатны сонгуулийг нэг жилд нэг өдөр хийдэг болгох зорилт тавин ажиллана гэдэгт найдаж байна гэдгээ ч онцолсон юм.