Монгол Улсын Ерөнхийлөгчид МАН-аас нэр дэвшигч Б.Бат-Эрдэнэ саналын хуудсыг гараар давхар тоолж баталгаажуулах талаар бусад нэр дэвшигчдэд хандан уриалга гаргасантай нь холбогдуулан ЦЕГ-аас МАН-ын сонгуулийн штабт шаардлага ирүүлжээ.

Уг шаардлагад манай нэр дэвшигчийн гаргасан уриалгыг хууль тогтоомж зөрчсөн, зөрчихийг уриалсан мэдэгдэл гэж ЦЕГ шууд үзсэн байх бөгөөд хууль зөрчсөн үйлдлийг дэмжих хандлага нийгэмд бий болгож, сонгуулийн үр дүнтэй холбоотой нийтийн эмх замбараагүй байдал, гэмт хэрэг, зөрчил гарах шалтгаан нөхцлийг бүрдүүлж байгаа хууль бус үйлдэл тул нэн даруй зогсоож, зохих арга хэмжээ авч, биелэлтийг 3 хоногийн дотор мэдэгдэхийг шаарджээ.

  Уг шаардлагын хариуд МАН-ын сонгуулийн штабаас энэхүү мэдэгдлийг гаргаж байна.   

Уриалгыг сонгогчдод бус, нэр дэвшигчдэд хандан гаргаж, сонгогчдын өгсөн саналыг тоолж дүнг гаргах ажлыг маргаангүй, харгүй, илүү ил тод, хяналттай, сайн зохион байгуулах ёстой гэж үзэж байгаагаа илэрхийлэн саналыг гараар давхар хянаж тоолох эрх зүйн боломжийг авч үзэх талаар нэр дэвшигч Б.Бат-Эрдэнэ хуулийн хүрээнд байр сууриа чөлөөтэй илэрхийлсэн болно.

Нэр дэвшигч Б.Бат-Эрдэнийн гаргасан уриалгад сонгогчдыг сонгуульд оролцохоос татгалзахыг болон хууль тогтоомж зөрчихөд хүргэх ямар нэгэн утга санаа, заалт байхгүй бөгөөд тэр тусмаа сонгогчдыг эмх замбараагүй байдал, гэмт хэрэг, зөрчилд турхирсан агуулга байхгүй болохыг хариуцлагатайгаар мэдэгдье.

Харин сонгогчдын саналыг тоолоход автомат машинаас гадна гар аргаар давхар хянаж тоолох боломжийг УИХ-ын бусад шийдвэр, эсхүл СЕХ-ны тогтоолоор бүрдүүлэн шийдвэрлэх асуудлыг хөндсөн.
АН-аас нэр дэвшигчийн зүгээс сонгогчдод илтэд мөнгөн амлалтыг хууль бусаар удаа дараалан өгч байгаа, төрийн албан хаагчдыг сурталчилгаанд дайчлан ашиглаж байгаа, Like нэрээр сонгогчдод мөнгө тараах, төлбөргүй үйлчилгээ явуулах, ухуулагчийн эрхгүй хүмүүсийг олноор сурталчилгаанд татан оролцуулж байгаа зэрэг хууль бус үйлдлүүдийг таслан зогсоох, хариуцлага тооцох талаар огтхон ч ажиллахгүй байгаадаа ЦЕГ дүгнэлт хийж хууль тогтоомжид заасны дагуу ажиллах учиртай.

Гэтэл цагдаагийн байгууллагын удирдлага эрх баригчдын захиалгад нийцүүлэн зарим хэрэг, зөрчлийг шүүхээр эцэслэн шийдвэрлээгүй байхад улс төрийн явцуу зорилгод илтэд ашиглагдахуйц, гүйцэд бус мэдээ, мэдээллийг зориуд тараахын зэрэгцээ, МАН-ыг хууль зөрчсөн, гэмт хэрэг үйлдэх гэж байгаа мэтээр дайрч, илэрхий сүрдүүлэн сонгуульд нэр дэвшсэн бусад этгээдийг дэмжин хуулийн дагуу ажиллахгүй байгааг эрс эсэргүүцэж байна.