УИХ-ын гишүүн Н.Номтойбаяр өнөөдөр сэтгүүлчдэд хандан мэдээлэл хийлээ. Өчигдөр Авилгатай тэмцэх сэтгүүлчдийн клуб ТББ-ын тэргүүн Б.Отгонбаяр хэвлэлийн хурал зарлаж Н.Номтойбаяр гишүүн өөрийг нь шүүхэд өгсөн талаар мэдээлэл хийсэн билээ.

2012 оны сонгуулийн үеэр Н.Номтойбаяр гишүүний туслах Б.Батзориг гэх залуу түүний холбоотой сөрөг мэдээлэлтэй  бичлэгийг олон нийтийн сүлжээнд байршуулсан байдаг.

Харин сэтгүүлч Б.Отгонбаяр уг бичлэгтэй холбогдуулан анализ, дүгнэлт хийсэн нийтлэлийг бичжээ. Үүнийх нь төлөө Б.Отгонбаяр сэтгүүлчийг буруутган, эрүүгийн хэрэг үүсээд байгаа аж. Энэ талаар УИХ-ын гишүүн Н.Номтойбаяр ярихдаа “Би Б.Отгонбаяр сэтгүүлчийг шалгуулахаар ямар ч гомдол, санал цагдаагийн газарт өгөөгүй. Энэ хүнийг таних ч үгүй юм байна. Өнөөдөр л албан ёсоор нүүр тулан танилцаж байна. Бичсэн материалыг өчигдөр л уншсан. Тэр нийтлэл ч учир дутагдалтай санагдсан. Гэхдээ би болон миний итгэмжлэгдсэн төлөөлөгчийн аль нь ч Б.Отгонбаяр сэтгүүлчийн эсрэг гомдол гаргаагүй гэдгийг албан ёсоор мэдэгдье. Цаашид гомдол гаргахгүй. Настай хүний эсрэг тйим зүйл хийх хүсэл ч алга” гэсэн юм. Тэрээр мөн “Би сэтгүүлчдийн ажил хөдөлмөрт тэвчээртэй, хүндэтгэж ханддаг. Би өчигдөр хөдөөнөөс ирээд л энэ тухай дуулсан. Яагаад Отгонбаяр сэтгүүлчийг мөрдөн шалгах болсныг холбогдох хүмүүсээс нь асуу. Харин би энэ хүний эсрэг гомдол гаргаагүй.” гэлээ.

Харин Н.Номтойбаярын туслахаар ажиллаж байсан Б.Батзориг нь гишүүнтэй холбоотой хэд хэдэн ноцтой баримт дэлгэсэн бичлэгийг интернэтэд тавиад гадаад руу оргон гарсан гэнэ. Харин Н.Номтойбаяр гишүүн “Би анх 2000 оны эхэн үеэр Б.Батзоригтой Багануур дүүрэгт танилцсан. Надад ажиллах хүсэлтэй байгаагаа  илэрхийлсэн. Үүний дагуу холбогдох материалыг нь бүрдүүлээд эргэн уулзахаар болсон. Ажилд орох холбогдох материалтай нь танилцахад ял шийтгэлтэй эсэхийг тогтоосон тодорхойлолтыг үзүүлээгүй. Яагаад гэвэл, Б.Батзориг тухайн үедээ “Монгол шуудан” банкинд ажиллаж байхдаа мөнгөний хэрэгт холбогдоод шүүхээр таслуулан тэнсэн харгалзах ялтай байсан гэсэн. Тэгээд тэр залууд итгэж, өөрийн туслахаар ажиллуулсан, үүний дараа Санхүү эдийн засгийн дээд сургуульд дөрвөн жил өөрийн мөнгөөр суралцуулсан. Тэгээд түүнийг МАК компанийн Хяналт, шалгалт мониторингийн хэлтэст ажиллуулж байсан. Гэтэл Б.Батзориг нь ажиллаж байх хугцааандаа надад хэлэлгүйгээр эхнэртэйгээ нийлэн сейфнээс нь 15 мянган евро буюу тухайн үеийн ханшаар 27 сая төгрөгийг авсан мөн компанийн санхүүгээс миний  нэрийг барьж 22 сая төгрөгийг олон удаагийн үйлдлээр авсан байсан” гэсэн юм.

Мөн Б.Батзориг нь Н.Номтойбаяр гишүүний найз Б.Батхуягаас найман сая төгрөг, Б.Батхуягийн нэр дээр байсан автомашины бичиг баримтыг хуурамчаар үйлдэн бусдад худалдаалсан, өөр олон мөнгө залилсан аж. Н.Номтойбаяр гишүүний талаар мэдээлэл цацсан өдөр буюу 2012 оны зургадугаар сарын 26-ний өдөр бичлэгийг тараан,  Монгол Улсаас зугтсан байдаг гэнэ.

Н.Номтойбаяр гишүүн Б.Батзоригийг хууль хяналтын байгууллагад өгч шалгуулж байгаа аж. Харин сэтгүүлч Б.Отгонбаяр ярихдаа “Н.Номтойбаяр гишүүн намайг цагдаад өгч шалгуулах явуулгыг хийсэн. Мөн намайг зодуулахаар хүмүүс явуулсан” гэсэн юм.