Ерөнхий сайд Н.Алтанхуягийн хамаатан садны эрт эдүгээгийн сүлжээ өдөр бүрээр л задарч байна. Саяхан түүний хүргэн ЗГХЭГ-ийн дэд дарга Г.Дэнзэн ерөнхийлөгчийн шахалтаар ажлаа өглөө. Тэгвэл түүний эхнэр буюу Г.Уянга нь өмнө Тэргүүн шадар сайд Н.Алтанхуягийн зөвлөхөөр ажиллаж байсан байж магадгүй нэгэн шинэ баримт олдлоо. Өөрөөр хэлбэл Н.Алтанхуяг төрсөн дүүгийнхээ хүүхдийг тэргүүн шадар сайд байхдаа зөвлөхөө хийлгэж байсан бололтой юм. Дахин тайлбарлавал нэг гэр бүлийн эхнэр, нөхөр хоёрыг зөвлөхөөрөө хамтад нь ажиллуулсан юм уу даа. Монголын улс төрийн түүхэнд ингэж эхнэр, нөхөр хоёр хамтдаа томоохон алба хашаад зэрэгцээд сууж байсан удаа байгаагүй. Гэхдээ уг баримт дээрх Г.Уянга гэдэг нь өөр Уянга байхыг ч бас үгүйсгэхгүй. Энэхүү баримтыг ЗГХЭГ-ийн ажилтнууд гадагш нь гаргасан байх магадлалтай гэж эх сурвалж хэллээ. Учир нь Н.Алтанхуяг ЗГХЭГ-ийн тэргүүн дэд дарга Ш.Солонгыг халах шийдвэр гаргаснаас болоод нилээд олон ажилтнууд ажлаа сайн дураараа өгөхөөр болсон юм. Түүний нэг нь ЗГХЭГ-ын Захиргааны хэлтэсийн дарга Б.Доньжчимбуу гэж туршлагатай тулхтай нэгэн бий. Энэ мэт туршлагатай хүмүүс Засгийн тэргүүнтэй хэл амаа олохгүй байгаа учир ээлж дараалан гарч байгаа аж.

   Г.Уянга нь одоо ч гэсэн Ерөнхий сайд Н.Алтанхуягийн орон тооны бус зөвлөхөөр ажиллаж байж магадгүй аж. Үүнийг ЗГХЭГ-ийнхан ч мэдэхгүй. Учир нь хэн Ерөнхий сайдын орон тооны бус зөвлөх болсныг мэдэх аргагүй. Зөвхөн боловсон хүчин нь мэддэг бололтой. Уг нь өмнөх Ерөнхий сайдууд хичнээн орон тооны болон орон тооны бус зөвлөхтэйгээ шууд зарладаг. Харин энэ удаа хичнээн орон тооны бус зөвлөхтэй нь мэдэгдэхгүй байгаа. Тиймээс Г.Уянга одоо ч орон тооны бус зөвлөх байж магадгүй гэж хардагдаад байгаа бололтой.

   Гэрэлхүүгийн Уянга нь саяхан ажлаа өгсөн Г.Дэнзэнгийн эхнэр. Түүний ээжийг Норовын Наранцэцэг гэдэг аж. Дуулиант “Говь повер” ХХК-ний захирал. Уг компанийг АТГ шалгах үндэслэлтэй гэж үзсэн. Харин прокурор шалгах шаардлагагүй гэсэн юм. Учир нь “Эрдэнэс-Тавантолгой” ХХK-ийн 17 тэрбум төгрөгийн тендерийг хүчингүй болгосноор ялалт байгуулсан  “Говь повер” ХХК-ийг шалгах утгагүй болсон. Ерөнхий сайдын гаргасан хууль бус шийдвэрийг хэлэлцэх гэхээр өмнө хүчингүй болгодогтойгоо адилхан үйлдлийг хийсэн юм.
     Ийнхүү Н.Алтанхуяг дүүгийнхээ 1990 онд төрсөн охиноор 2011 онд зөвлөхөөр хийлгэж байсан байж магадгүй өөрийнх нь гарын үсэгтэй хөдлөшгүй баримт гарч ирж ирэх шиг боллоо. Өөрөөр хэлбэл 2011 онд түүний дүү Г.Уянга 21 настай байсан гэсэн үг. 21 нас гэдэг бол дөнгөж л их сургуулиа төгсөж байсан үе нь байж мэднэ. Саяхан нэгэн том албан тушаалтан Н.Алтанхуягийг “Олон хамаатантай дарга хэцүү байдаг бололтой” хэмээн дайруулж хэлсэн билээ.