Ардчилсан намын Ерөнхий нарийн бичгийн дарга Ц.Оюундарь, намын сонгуулийн штабын ерөнхий менежер Ч.Сайханбилэг нар дөнгөж сая мэдээлэл хийлээ. Хэвлэлийн хурал “Пума империал” зочид буудалд болсон юм. Хэвлэлийн бага хурлын өмнө Ардчилсан намын Ерөнхий нарийн бичгийн дарга Ц.Оюундарь “Энэ бол албан бус мэдээлэл” гэдгийг онцлоод, аймаг, дүүргийн хэсгийн хороод дахь ажиглагч нараасаа ирүүлсэн мэдээллийг үндэслэн мэдэгдэл хийлээ. Үүнд, Сонгинохайрхан дүүргийн 32 хэсгийн хорооны 30-д нь, Багахангай, Багануур дүүрэгт мөн АН-аас нэр дэвшигч Ц.Элбэгдорж ялсан гэх мэдэллийг тус намын Ерөнхий нарийн бичгийн дарга Ц.Оюундарь өглөө. Мөн Чингэлтэй дүүргийн 47 хэсгийн хорооноос 41-д ялсан, Хан-Уулд хавтгай ялсан гэнэ. Түүнчлэн Налайх дүүрэгт долоон хэсгийн хороонд ялсан мэдээ иржээ. Орон нутгийн хувьд Хөвсгөл аймгийн 20 суманд, Дорнод аймагт Дашбалбар, Халхгол суманд тус бүр ялсан. Дархан-Уул, Сэлэнгэ аймгийн төв,  Зүүн хараа, Хөтөлд тосгонд ялсан бол Ховд аймгийн Зэрэг суманд 88 хувиар ялсан, Өвөрхангай аймгийн Зүүн баян, Уянга суманд ялсан, Төв аймгийн Ар хуст, Архангайн Хотонт суманд Ардчилсан намаас нэр дэвшигч Ц.Элбэгдорж яллаа гэх мэдээллийг өглөө. Түүнчлэн, АН-аас Сонгуулийн ерөнхий хорооны мэдээллийг үндэслэн дахин мэдээлэл хийх болно гэлээ.