МАН-аас Ерөнхийлөгчийн сонгуулийн дүн мэдээтэй холбогдуулан хэвлэлийн хурал хийлээ.

Тус хурлаар Ерөнхийлөгчийн сонгуульд МАН-аас нэр дэвшигч Б.Бат-Эрдэнэд өгсөн 2166 хүний санал дутсан талаар мэдээлсэн юм.  Тодруулбал СЕХ-оос өчигдөр 01.30 цагт мэдээлэл хийхдээ нийт хүчинтэй санал 1.224.941 байснаас Ц.Элбэгдоржийн төлөө 614964 Б.Бат-Эрдэнийн төлөө 514.375 санал буюу 41.99 хувь Удвалын төлөө 79.833 санал буюу 6.51 хувь өгсөн тухай хэлсэн. Дараа нь 02.52 минутад албан ёсоор мэдээлэл хийхдээ 1870 хэсгээс ирсэн нэгдсэн дүнгээр нийт 1.234.692 санал байснаас Ц.Элбэгдоржийн төлөө 620.132 санал буюу 50.22 хувь,Б.Бат-Эрдэнийн төлөө 512, 209 санал буюу 41,48 хувь, Н.Удвалын төлөө 80,398 санал буюу 6.51 хувийн санал авсан тухай мэдээлсэн.

 Үүнээс  үзвэл төв серверт ирсэн мэдээллээр Б.Бат-Эрдэнэ нэр дэвшигчийн төлөө 514. 375 санал авсан гэж зарласныхаа  дараа 512.209 санал болгож бууруулж мэдээлсэн. Ингэхээр 2166 хүний санал дутаж байна хэмээн МАН-ын зүгээс хэллээ. Тиймээс 2166 хүний санал яагаад дутсаныг нягталж, шалгаж өгөхийг СЕХ-оос хүссэн байна.

Хэрвээ энэ тоо нэр дэвшигчийн саналаас үндэслэлгүйгээр хасагдсан бол сонгуулийн хуульд заасны дагуу 50+1 буюу анхан шатны санал хураалтад оролцсон нийт сонгогчдын "50+" хэмжээнд өөрчлөлт орж болох байдал харагдаж байна. Иймээс СЕХ-нд нягтлан шалгах хүсэлтийг явуулсан. Энэ асуудлаар ойлголцох нь сонгуулийн дүнг албан ёсоор баталгаажуулж гаргахад ач холбогдолтой гэж үзэж байна. Мөн сонгуулийн дүнг гаргахад сонгуульд нэр дэвшигчийн саналын тоо, хувь аль аль нь сонгуулийн нөхцөл байдалд өөрчлөлт оруулах үр дагавартай. Хэрэв энэ санал нь манай нэр дэвшигч дээр нэмэгдэж Ц.Элбэгдорж нэр дэвшигчийн саналд тодорхой хэмжээний өөрчлөлт орох юм бол дахин санал хураалт явуулах хүртэл хуулийн заалт бий гэж МАН-ын нарийн бичгийн дарга Ж.Сүхбаатар хэллээ. 

Гэхдээ сонгуулийн санал тоолох үйл ажиллагаа албан ёсоор баталгаажаагүй учир тоогоо нягталж шалгачихаад дахин мэдээлэл хийнэ гэсэн. Энэ бол сонгуулийн дүнг шууд үгүйсгэж байгаа мэдэгдэл биш гэдгийг тэд мөн хэлсэн юм.