Ерөнхийлөгчийн сонгуульд 50,23 саналаар  ялсан АН-ын нэр дэвшигч Ц.Элбэгдоржид түүнтэй өрсөлдсөн УИХ-ын гишүүн Б.Бат-Эрдэнэ баяр хүргэсэн билээ. Тэрбээр өнөөдөр МАН-аас зохион байгуулсан хэвлэлийн бага хурлын үеэр "Монгол Улсын Ерөнхийлөгчийн сонгуульд нэр дэвшээд эх орноо нар зөв тойрч сонгогчидтойгоо уулзлаа. Хаа очсон газар миний Монголын ард түмэн намайг халуун дотноор хүлээж авч, надад их итгэл, эрч хүч өгч байсан. Би Монгол Улсын Ерөнхийлөгчид нэр дэвшээд бусад нэр дэвшигчиддээ хандаж уриалга гаргасан. Сонгуулийг "харгүй" сайхан явуулах нь зүйтэй байна гэсэн. Ингэж чадвал нийгэмд шударга ёс тогтох, ард түмний маань итгэл сэргэх, төр түвшин тунгалаг болоход чухал үйл явдал болно гэж уриалсан. Ямартаа ч Монгол Улсын Ерөнхийлөгчийн сонгуульд ялалт байгуулж АН-аас нэр дэвшигч Ц.Элбэгдорждоо баяр хүргэж амжилт хүсье. Мөн МАХН-аас нэр дэвшигч Н.Удвалдаа баяр хүргье. Сонгуулийн ажил бол цаг нартай уралдсан амаргүй ажил байна. Ийм их ажлыг амжуулахад даага болж зүтгэсэн бүх хүмүүст бүгдэд нь баярлалаа. Ард түмнийхээ халуун сайхан дэмжлэг, итгэлд сэтгэл их өндөр байна.

Хүч тэнцвэргүй, маш хэцүү сонгууль боллоо. Гэсэн ч намайг дэмжсэн ард иргэд, намынхандаа баярлалаа. Мөн ард түмэндээ баярласан талархаснаа дахин дахин хэлэе" гэв.