Ерөнхийлөгч Ц.Элбэгдоржийн улиран сонгогдох болсон ялалтын баярыг Сүхбаатарын талбай дээр тэмдэглэлээ. Энэ үеэр Ерөнхийлөгч Ц.Элбэгдорж иргэддээ хандан үг хэлээ.

- "Ард түмэндээ баярлалаа. Аав минь, ээж минь болсон ард түмэндээ баярлалаа. Их өвөг дээдэс, хөх мөнх тэнгэр эзэн Чингистээ баярлалаа. Өнөөдөр 2 сая 900 мянган Чингис Монголын тал нутагт сэрж байна.  Би ард түмэн та бүхний төлөө зүтгэнэ. Монгол улс таныхаа төлөө өсгөсөн хүү шиг чинь үнэнчээр  зүтгэнэ. Би ард иргэддээ эрх чөлөө, аз жаргалыг эдлүүлэхийн төлөө, улс орондоо хууль, шударга ёс тогтооохын төлөө зүтгэнэ. Ардчиллын, ард түмнийхээ буянаар дэлхийн нүдийг нээж чихийг дэлдийлгэсэн сайхан сонгууль боллоо.

   Ардчиллын бунаар алдартай аварга нэр дэвшлээ, анх удаа эмэгтэй хүн нэр дэвшлээ. Би Б.Бат-Эрдэнэ, Н Удвал нартай хамтран ажиллах болно. Намайг дэмжсэн ард түмнийхээ итгэлийг дааж, өрсөлдөгчийг маань дэмжсэн тэр хүмүүсийн итгэлийг  авахын тулд улам шургуу ажиллах болно.

  Би Монгол улсынхаа нэр хүндийг олон улсад сайнаар авч явж чадна, үүний төлөө зүтгэнэ. Би Монголын ард түмний хүсэл мөрөөдөл, сайн сайхны төлөө явна.

  Монгол түмний минь буян заяа, хийморь сүлд, ажил үйлс нь үргэлж өөдрөг байх болтугай. Миний Монгол мандтугай.  Монгол түмний эрх чөлөө, тусгаар тогтнол мандтугай. Монгол улын төлөө зүтгэе" гэв.