Сурталчилгааны өрсөлдөөнт уур амьсгалд явагдсан Монгол Улсын Ерөнхийлөгчийн сонгууль нь үндсэн эрх, эрх чөлөөг дээдэлсэн байдалтайгаар явагдлаа. Сонгуулийн сурталчилгаа үндсэн эрхүүдийг хүндэтгэсэн орчинд өрнөсөн нь үзэл бодлоо илэрхийлэх  эрхийг хууль, эрх зүйн зохицуулалтаар бүрэн хангасантай холбоотой юм  гэсэн дүгнэлтээ сонгууль ажиглах олон улсын багийн зүгээс олон нийтэд мэдэгдлээ.

    Мөн энэхүү сонгууль нь шинэчлэн сайжруулсан Монгол Улсын Ерөнхийлөгчийн сонгуулийн тухай хуулийн дагуу зохион байгуулагдсан хэдий ч тодорхой бус зүйл заалт, орхигдуулсан зохицуулалт ихтэй байгаа нь хуулийг нэг мөр тайлбарлах, хэрэгжүүлэхэд бэрхшээл учруулж байсныг  тэд мэдэгдэлдээ цохон тэмдэглэсэн байна.

    Европын  аюулгүй байдал, хамтын ажиллагааны байгууллагын  Ардчилсан институц, хүнийн эрхийн Газрын ажиглагчдын багийн  удирдагч, Элчин сайд хатагтай Одрий Гловер Монгол Улсын Сонгуулийн Ерөнхий Хорооны дарга Ч.Содномцэрэнтэй уулзах үеэр  ажиглалтынхаа эцсийн илтгэлээ удахгүй гаргана гэдгээ хэлсэн байна.