2013 оны Ерөнхийлөгчийн сонгуульд МАН-ын нэр дэвшигч ялагдахад нөлөөлсөн хүмүүст хариуцлага тооцохоо тус намын ерөнхий нарийн бичгийн дарга Г.Занданшатар хэвлэлийн хурлын үеэр мэдэгдлээ. Тэрбээр "Сонгуулийн дүн хараахан эцэслэн гараагүй ч МАН ялагдлаа хүлээн зөвшөөрсөн. Гэхдээ бид нэр дэвшигчдийн авсан саналын тоог нягталж байгаа. Энэ удаагийн сонгуул үнэхээр хүч тэнцвэргүй, эрх мэдэл, мөнгөний сонгууль боллоо гэж үзэж байна. Учир нь улсын төсөв, орон нутгийн төсөв, төрийн албан хаагчдын хүчийг дайчилсан сонгууль болсон.

Гэсэн ч манай намын Удирдах зөвлөл удахгүй хуралдаж энэ удаагийн сонгуулийн алдаа, оноог хэлэлцэнэ. Сонгуульд муу оролцоход нөлөөлсөн Удирдах зөвлөлийн гишүүддээ хариуцлага тооцно. Мөн сонгуульд идэвхитэй ажилласан хүмүүсээ ч урамшуулна" гэв.
   Сэтгүүлчид түүнээс тус намын залуучууд намын дарга Ө.Энхтүвшинг огцруулах шаардлага тавих гэж байгаа талаар асуухад "Залуу гишүүд Ө.Энхтүвшин даргыг огцруулах хүсэлтийг албан ёсоор тавиагүй байгаа. Ямар нэг хүн өөрчлөгдсөнөөр шинэчлэл болохгүй. Гэхдээ бид шинэчлэлийн төлөө хариуцлагаа хүлээхэд бэлэн байгаа" гэсэн юм.