МАН-ын Бага хурал ирэх долдугаар сард хуралдахаар болсныг тус намын ерөнхий нарийн бичгийн дарга Г.Занданшатар мэдээллээ. Энэ хурлаар сонгуулийн үр дүнг хэлэлцэхээс гадна хамгийн гол асуудал нь намын шинэчлэл байх гэнэ.  Хурлаар намын шинэчлэлийн үзэл баримтлал, онол агуулга, үйл ажиллагааны  ёс зүйн дүрмийн стандартыг шинэчлэх аж. Тухайлбал авлигатай холбогдоод байгаа МАН-ын гишүүдийг цэгцэлнэ гэлээ. Мөн намын мөрийн хөтөлбөрийн стандартын хэлэлцүүлгийг нийт гишүүдийн дунд зохин байгуулахаар болжээ. Түүнээс "Ё.Отгонбаяр гишүүн энэ цэгцлэх асуудалд хамаарах уу?" гэж асуухад "Ё.Отгонбаяр гишүүний асуудал бол хувь хүнийх биш, намын асуудал" гэснээс өөр хариулт хэлсэнгүй.

  Г.Занданшатар "Шинэчлэлийн ажлыг эрчимжүүлж байгаа энэ үед жигүүр хөдөлгөөнүүд борооны дараах мөөг шиг үүсч болохүй. Тиймээс намын нийт гишүүдээ шинэчлэлийн хороонд нэгдэж намынхаа эв нэгдлийг хангаж ажиллахыг уриалж байна" гэв.