У.Хүрэлсүхийн үед хүчтэй байлаа. Г.Занданшатарын үед замруулж явлаа. Л.Оюун-Эрдэнийн үед олигтой байсангүй хэмээх хэлц үг бий. Энэ бол МАН-ын дэргэдэх залуучуудын байгууллагын тухай зүйрлэл л дээ. Үнэхээр МАН-ын залуучуудын байгууллага У.Хүрэлсүхийн үед нийгмийг байлдан дагуулж байсныг олон хүн гэрчлэн ярьдаг. Г.Занданшатарын үед олон залуучууд саагчиж яваад "Хадгаламж" банкны 14 тэрбумаар гараа угаасан хэрэгт холбогдож ихээхэн дуулиан дэгдээсэн дээ. Одоо ч энэ банкны хохиролыг барагдуулж дуусаагүй байна. Харин Н.Оюун-Эрдэнийн үед энэ байгууллага унтрах шинжиндээ орсон. МАН-ын залуучуудын байгууллага сүүлийн хэдэн сонгуулиар маш муу ажилласан. Тиймээс л энэ үеийг хамгийн идэвхигүй үе гэж яридаг аж. Магадгүй түүхэндээ хамгийн сул удирдлагатай байсан ч байж мэднэ.

  Хамгийн сүүлийн мэдээллээр бол МАН-ын дэргэдэх НАМЗХ-ны тэргүүн Н.Оюун-Эрдэнэ гадагшаа сурахаар явсан  учир ажлаа өгчээ. Уг нь НАМЗХ-ны дүрмээр бол ерөнхийлөгч нь ажлаа өгөх, шинээр ерөнхийлөгч томилох асуудлыг их чуулганаараа шийдвэрлэдэг аж. Гэтэл Л.Оюун-Эрдэнэ гэнэт л Удирдах зөвлөлийнхөө хурлаар ажлаа өгөх болсноо дуулгасан сураг байна. Тэгээд өөрийнхөө оронд УИХ-ын гишүүн Н.Номтойбаярыг санал болгон түр орлон гүйцэтгэгчээр томилуулжээ. Үүнийг МАН-ын залуучууд нь ч мэдээгүй яваа гэнэ. Үйл явдал яагаад ингэж өрнөх болсон талаар эх сурвалжууд янз бүрээр тайлбарлаж байна. Зарим хүмүүс НАМЗХ их чуулганаа хийгээд залуучуудаа цуглуулах гэхээр Л.Оюун-Эрдэнэд хийсэн олигтой ажил байхгүй, зөвхөн өөрийгөө бодоод сургуульд явж байгаа учир гишүүдээ харах нэр нүүргүй болсон. Тиймээс л сэмхэн ажлаа өгөх болсон гэж тайлбарлаж байна.

   УИХ-ын гишүүн Н.Номтойбаярыг яаран сандран НАМЗХ-ны ерөнхийлөгчийн үүрэг гүйцэтгэгч болсон нь залуучуудын байгууллагынхаа дүрэмийг зөрчсөн гэж үзээд байгаа аж. Тэгээд ч нэр хүндээ унагаж яаран сандран энэ ажлыг авсан нь зохимжгүй болсон гэнэ. Харин ч чуулганаа хуралдуулаад нэртэй төртэй тамгаа гардаж авах ёстой байжээ. Ер нь НАМЗХ-ны тэргүүн нь УИХ-ын гишүүн байдаг жишиг бий. Энэ жишиг хамгийн сүүлд эвдэгдэж Л.Оюун-Эрдэнийг томилсон байдаг. Уг нь тухайн үед УИХ-ын гишүүн С.Бямбацогт, Ж.Энхбаяр, Ж.Сүхбаатар гурвын хэн нэгнийг нь НАМЗХ-ны ерөнхийлөгч болгохоор намынх нь удирдлагууд тохирсон байсан гэгддэг. Гэтэл У.Хүрэлсүх гэнэт тохирооноосоо буцаж Л.Оюун-Эрдэнийг томилуулсан юм. Харин одоо хуучин бодлогоороо УИХ-ын гишүүнийг ерөнхийлөгч болгохоор тохирчээ. Ийм байхад их хурлаа хуралдуулаад дүрэм журамынх нь дагуу авсан бол Н.Номтойбаярын нэр хүндэд хэрэгтэй байв. Үүний нэг илрэл болгож Н.Номтойбаяр Л.Оюун-Эрдэнийг гадаад явахад сургалтынх нь төлбөрөөс нь төлөлцсөн учир ерөнхийлөгчийн орлон гүйцэтгэгч болсон гэсэн хорлонтой яриа эхнээсээ гараад эхэлжээ. Ийм ярианы бай болох шийдвэрийг гаргасан Н.Номтойбаярын буруу л даа. Одоо тэгээд их хурлаа хийгээд түүнийг жинхлэх гэхэд залуучууд нь зөвшөөрөхгүй бол яахав? Н.Номтойбаяр бүр л хэцүү байдалд орно.

   Үүний зэрэгцээ У.Хүрэлсүх Н.Номтойбаярыг залуучуудын холбооныхоо ерөнхийлөгч болгож болохгүй гэсэн чиглэлийг Л.Оюун-Эрдэнэдээ өгсөн байсан. Харин Л.Оюун-Эрдэнэ нь У.Хүрэлсүх ахынхаа үгэнд орохгүй мөнгөнд болсон байх гэсэн дэл сул яриа МАН-ын цагаан байрнаас гадагшилж эхлэв. Эдгээр нь үнэн худал эсэхийг ирэх өдрүүдийн дуулиан нотолж өгнө.

   Ийнхүү МАН-ын хамгийн нөлөө бүхий залуучуудын байгууллагын тэргүүний үүрэг гүйцэтгэгчээр УИХ-ын гишүүн Н.Номтойбаяр чимээгүйхэн томилогдсон байна.