Өнөөдөр УИХ дахь намын бүлгүүд хуралдсан билээ. МАН-ын бүлгээс сэтгүүлчдэд мэдээлэл хийхээс татгалзсан бол Шудрага ёс бүлэг, Ардчилсан намын бүлгээс мэдээлэл хийлээ.

Өнөөдрийн АН-ын бүлгийн хуралдаанаар долдугаар сарын 1-нд амь үрэгдэгсэдийн гэгээн дурсгалыг хүндэтгэсэн байна.

АН-ын бүлгийн дарга Д.Эрдэнэбат өнөөдрийн бүлгийн хурлын талаар мэдээлэхдээ "Өнөөдрийн хуралдаанаар манай намын зарим гишүүдийн өргөн барьсан Ерөнхийлөгчийн тангараг өргөх журмыг өөрчлөх тухай саналыг авч хэлэлцэж, гишүүдийн дийлэнх нь энэхүү саналыг дэмжлээ. Ер нь ард түмнээс сонгогдсон Ерөнхийлөгч ард түмнийхээ өмнө тангараг өргөх ёстой гэж үзсэн. Үүний дараа  энэ намрын чуулганаар УИХ-аар ямар асуудлыг бодлогын хүрээнд авч хэлэлцэх зүйтэй вэ гэсэн тогтоолын төсөлд анхаарлаа хандуулсан.Одоо сонгууль дууссан  учраас УИХ болоод ард иргэдийнхээ амьдралыг дээшлүүлэхэд маш олон ажлыг амжуулна. Намрын чуулганаар Эдийн засгийн хөгжлийн тухай багц хууль, Газрын тухай багц хууль, Сонгуулийн тухай хууль, Намуудын тухай, Эхчүүдэд тэтгэмж дэмжлэг олгох тухай хууль "Олуулаа" хууль, Баялагийн сангийн тухай хууль, Хөрөнгө оруулалтын тухай хууль гээд олон хуулиудыг зайлшгүй шинэчлэх шаардлагатай гэж үзэж байгаа. Эдийн засгийн хөгжлийн яамнаас Эдийн засгийн багц хуулийн мэдээллийн өнөөдрийн бүлэг дээр сонссон. Өнөөдөр энэ хуулийг хараахан өргөн бариагүй ч гэсэн АН-ын гол эдийн засгийн суурь бодлогыг тодорхойлох хууль учрааас бид үүн дээр анхаарал хандуулна. Өргөн хэлэлцүүлэг хийж, ажлын хэсэг байгуулж нухацтай ажилласны дараа өргөн барина. Энэ хүрээнд бид тендерийн тухай хуулийг шинэчлэх шаардлагатай гэж үзээд байна" гэлээ.