МАН-ын залуу гишүүдийн зүгээс "Шинэчилье" хөдөлгөөн байгуулан намынхаа үйл ажиллагаа, бодлого зорилт, мөрийн хөтөлбөр, удирдлагуудыг шинэчлэхээр ажиллах болсон тухайгаа өнөөдөр албан ёсоор мэдэгдлээ. Тиймээс ч намын бага хурлыг нэн даруй хийхийг шаардсан албан бичгийг өнгөрсөн баасан гаригт намын удирдлагууддаа өгсөн байна. Тэгвэл тус "Шинэчилье" хөдөлгөөнийг УИХ-ын гишүүн Н.Номтойбаяр, О.Содбилэг, Ж.Энхбаяр, Я.Содбаатар нар дэмжиж байгаагаа илэрхийлж сэтгүүлчдэд мэдээлэл хийлээ.

Дээрх залуус 2009 оны Ерөнхийлөгчийн сонгуулиас хойшхи бүх сонгуульд  дараалан ялагдсан нь намын бодлого, үйл ажиллагааны зогсонги байдалд орж, ард түмний дунд нэр хүнд нь унаж, улс төрийн намын манлайлах байр суурнь алдагдсантай холбоотой хэмээн үзэж, энэхүү хөдөлгөөнийг байгуулжээ.



Тус уриалгад МАН-ын Бага хурлыг 2013 оны долдугаар сарын 8-ны өдрөөс өмнө хуралдуулж, 27-р их хурлын  тов зарлах, намын даргыг сонгох, намын гишүүд, дэмжигчид, олон нийтийн дунд үндэсний хэмжээний нээлттэй сунгаа зохион байгуулах, намын үзэл баримтлал, үйл ажиллагаа, бүтэц зохион байгуулалт, санхүүжилт, ёс зүй, хариуцлагын зарчмуудыг шударга, ил тод, болгон шинэчлэх, Авлигын гэмт хэрэгт холбогдсон намын нэр бүхий зарим гишүүдээс болж МАН-д итгэх ард түмний итгэл дэмжлэгийг алдсан нөхцөл байдалдаа дүгнэлт хийж, улс төр, ёс зүйн хариуцлага тооцон авлигагүй нам болохыг намын бүх шатны байгууллагууд удирдлага,  сүүлийн хоёр сонгуульд дараалан ялагдуулсан намын удирдлагууд бүрэлдэхүүнээрээ хариуцлага хүлээх зэрэг шаардлага багтжээ. Энэхүү уриалгаа тэд өнөөдөр хуралдахаар болсон МАН-ын Удирдах зөвлөлийн хуралд хүргүүлэх юм байна.

Мөн тэд Н.Алтанхуягийн Засгийн газар болон намынхаа удирдлагуудыг огцрох хэрэгтэй гэдгийг хурлын эхэнд онцолсон юм. Тухайлбал Н.Номтойбаяр гишүүн  “Махны үнэ буурахгүй байгаа нь Н.Алтанхуягийн өөрийн махны үйлдвэртэй нь шууд холбоотой. Үүнийг шалгах ёстой. Мөн МАН залуучуудаа дэмжиж ажилламаар байна. Хуучны арга барилаасаа салах цаг хэдийнэ ирсэн” гэлээ.

 "Шинэчилье" хөдөлгөөний залуус шат шатны сонгуульд МАН амжилтгүй оролцсон талаар ярихдаа "Өнгөрсөн гурван сонгууль бол өөр хоорондоо эрс ялгаатай. УИХ-ын сонгуулиар 31 хувийг авсан. Орон нутгийн сонгуулиар 40 орчим хувийн ялалт байгуулсан. Орон нутгийн сонгуулийн онцлог нь тухай орон нутагт байгаа намын удирдлагуудын үүрэг оролцоотой ажил байдаг. Тэгэхээр энд хэн нэгэн намын удирдлагад сууж байгаа хүмүүсийн нэр нүүртэй холбоотой гэж үзэхгүй байна. Ерөнхийлөгчийн сонгууль бол нам гэхээсээ илүү нэр дэвшигч маань илүү түлхүү ажиллаж, 520 мянга орчим хүний санал авсан нь багагүй амжилт юм" гэсэн юм.