УИХ-ын гишүүн Н.Номтойбаяр МАН-тайгаа ч, АН-тай ч авалцахаар томоохон төлөвлөгөө боловсруулсан байна. Түүнд бяр амтагдаад байгаа учир ингэж хоёр талд хүчээ үзэхээр шийдсэн бололтой. Тэр намынхаа залуучуудын холбоог удирдаж шинэчлэлийн асуудлыг эрчимтэй хөндөж эхэлсэн. Үүний зэрэгцээ эртний “дайсан” Н.Алтанхуягийнхаа асуудлыг ч орхихгүй байна.

Учир нь өчигдөр МАН-ын шинэчлэлийн асуудлаарх хэвлэлийн бага хурлынхаа үеэр Н.Алтанхуягийн асуудлыг хөндөж “АН-ын гишүүдээ загас толгойноосоо эхэлж өмхийрдөг” хэмээн сануулсан нь зохимжтой байсангүй. Намын шинэчлэлийнхээ хажуугаар эрх баригч хүчнийг яриад, Засгийн тэргүүнтэй тооцоо бодох гэсэн хувийн бодлогоо хольж яриад байгаа нь энэ залуу төлөвших болоогүйг харуулав.

Тэрээр Ерөнхий сайдын “Мах экспорт” ХХK төрийн өмчит “Эрдэнэс Тавантолгой” компанид өндөр үнээр мах шахдаг болохыг олон нийтэд зарлав. Н.Номтойбаяр өмнө нь Г.Дэнзэнг Н.Алтанхуягийн хүргэн болохыг, түүний эхнэрийн “Говь повер” ХХK 17 тэрбумын тендерт ялалт байгуулсныг, хуурамч бичиг баримт үйлдсэнийг,   Г.Дэнзэнгийн эгч Г.Одонгэрэл “Эрдэнэс Тавантолгой”-д ажилладаг болохыг хамгийн анх зарлаж байсан. Тэр бүхэн нь үнэн байсан. Тиймээс Н.Номтойбаяр гишүүний энэ удаагийн дэлгэсэн Ерөнхий сайдын “Мах экспорт” ХХK төрийн өмчит аж ахуйн нэгжүүдэд өндөр үнээр мах шахдаг нь батлагдвал ихээхэн дуулиан болох нь гарцаагүй юм. Учир нь зах зээлээс өндөр үнээр, тендергүй мах нийлүүлсэн нь батлагдвал дэнжигнэж буй Н.Алтанхуягийн зам шулуудаж мэднэ. Тэгээд ч Засгийн тэргүүний хувийн компанийн энэ үйлдэл батлагдвал ашиг сонирхолын хуулийн хүрээнд асуудал яригдана. Ерөнхий сайд Н.Алтанхуяг гэж ханаж цаддаггүй эрхэмийн байр суурийг АН хязгаарлаж чадахгүй бол ард түмэн хариуцлага ярих болно. 

Хамгийн ноцтой нь Засгийн газар махны үнийг тогтворжуулах нэрээр өнгөрсөн өвөл 87 тэрбум төгрөгийг төсвөөс гаргасан. Энэ мөнгөний тодорхой хэсэг Ерөнхий сайдын “Мах экспорт” ХХK-д зориулагдсан байж магадгүй гэж МАН-ынхан үзэж байгаа аж. Тиймээс энэ чиглэлийн шалгалт шүүлэгийг эхлүүлсэн байна. Хэрэв энэ нь батлагдвал Н.Алтанхуяг Улаанбаатарын иргэдийг хямд махаар хангах гэж биш хувийн аж ахуйн нэгжээ тэтгэх гэж 87 тэрбумыг гаргасан болж таарна. Удахгүй энэ талын шинэхэн мэдээлэлийг Н.Номтойбаярын удирддаг МАН-ын залуус танилцуулах бололтой.

Н.Алтанхуяг өмнө Тэргүүн шадар сайдаар ажиллаж байхдаа SARS ханиаднаас болж төсвөөс ихээхэн хэмжээний мөнгийг чацарганд зориулж гаргасныг хувийн компанидаа зориулан өгсөн гэж баахан шуугиж байсан юм. АН-ын дарга, Ерөнхий сайд ийм түүхээ давтаж магадгүй байна.

Ард түмний хөрөнгөд гараа дүрэх дуртай даргатайгаа АН хариуцлага ярихгүй байгаа учир МАН-ын залуус санаачилгыг гартаа авч эхэллээ.