МАН-ын Удирдах зөвлөлийн хурал ойрд болоогүй олон сюрпризтэйгээр үргэлжилжээ. Хамгийн түрүүнд МАН-ын Удирдах зөвлөл хуралдахыг мэдсэн залуучууд нь амралтын өдөр цуглаж ямар сюрприз барихаа ярилцсан байна. Тэгээд Удирдах зөвлөлийнхөө хурлаас өмнө хэвлэлийн хурал хийж, уриалга гаргая. Дараа нь Удирдах зөвлөлийнхөө хуралд урилгагүй зочин болж очъё. Оруулахгүй гэвэл сайхан дуулиан болно. Оруулбал бид өөрсдөө од болно гэсэн гаргалгаа хийгээд төлөвлөгөөнийхөө дагуу үйл ажиллагаа явуулжээ.

    Хэвлэлийн хурал хийж, намынхаа Удирдах зөвлөлийн хуралд бүгдээрээ очиж шаардлага, уриалгаа танилцуулна гэжээ. Харин намын удирдлагууд дургүйцсэнгүй. Удирдах зөвлөлийн хуралд орж байр сууриа илэрхийлэхийг зөвшөөрчээ. Өөрсдийгөө МАН-ын шинэчлэлийн түүхэнд үлдэнэ гэж горьдоод байгаа залуус дуртай нь аргагүй хуралд орж уриалгаа Удирдах зөвлөлийнхөө гишүүн бүртээ тарааж өгөхийг зэрэгцээ байр сууриа илэрхийлсэн байна. Тэд хамгийн түрүүнд намын бага хурлыг энэ сарын наймны өдөр буюу наадмаас өмнө хуралдуул гэсэн шаардлага тавьсан. Уг асуудлыг хэлэлцээд энэ сардаа багтааж Бага хурлаа хийлгэнэ. Харин товыг нь МАН-ын дарга тогтоох шийдвэр гаргажээ. Мэдээж Ө.Энхтүвшин наадмын өмнө хуралдуулахгүй нь тодорхой. Ингээд залуучуудын эхний шаардлага талаар болжээ. Уг нь Ц.Нямдорж залуучуудын тавьж буй шаардлагыг ихээхэн дэмжиж тэдний хүсэлтийн дагуу их,  бага хурлаа хуралдуулья гэсэн санал ч гаргасан байна. Үүний зэрэгцээ Ц.Нямдорж “манай залуучууд зориггүй” гэсэн битүү утгатай үг унагажээ. Мэдээж энэ хэнд зориулсан ямар утгатай болохыг залуучууд нь сайн ойлголгүй гарч оджээ. Харин намын нарийн бичгийн дарга Д.Цогтбаатар шинэчлэлийг оройтож ярьж байна. Бидний шинэчлэл аль эрт эхэлсэн шүү дээ. Одоо яригдаж буй асуудал бүрийг дэмжих ёстой гэсэн ардчилсан байр сууринаас асуудалд хандсан байна.

    Ширүүхэн болсон МАН-ын хуралын үеэр Удирдах зөвлөлийн гишүүн, нарийн бичгийн дарга Ж.Мөнхбат албан тушаалаасаа татгалзаж байгаагаа мэдэгдсэн байна. Учир нь тэрээр “Шинэчилье” хөдөлгөөний идэвхитэй оролцогч учир албаасаа татгалзах иргэний зоригтойгоо харуулж намын шинэчлэлд алдхан биеэ зориулна гэсэн байна. Тэгсэн мөртлөө “Үнэн” сониныхоо эрхлэгчийн ажлаас татгалзаагүй аж. Энэ байдлыг ажигласан ахмадууд нь хариуцлага хүлээх учиртай хүн байж асуудал ярихаас өмнө ингэж бултах хэрэггүй. Албаасаа татгалздаг хүн болж дараагийн удирдлагад орох гэж явуургүй зан гаргах нь утгагүй. Угаасаа одоогийн бүх удирдлага солигдох нь тодорхой болчихоод байхад ингэж жүжиг тавих нь зохимжгүй гэж дургүйцэх хүмүүс ч байжээ.
    Өчигдөр оройны МАН-ын Удирдах зөвлөлийн хурлаар ярьсан өөр нэг ноцтой асуудал нь "манай намыг авлигал баллаж байна. Тиймээс авлигалд орооцолдсон нөхөдөө намаасаа хөөх шийдвэр гаргая" гэж нэгэн нарийн бичгийн дарга ярьжээ. Үүний зэрэгцээ өөр нэгэн дарга нь БНСУ-д очиж казино тоглосон нөхөдөө ч гэсэн хөөе гэж хадуурсан байна. Үнэхээр ингэж эр зориг гаргаж чадвал энэ нам цэвэршинэ. Бас одоогийн олон лидерээсээ сална гэсэн үг. Тухайлбал авлигалд холбогдогчид нь Ё.Отгонбаяр, Н.Хүрэлбаатараас эхлээд урт жагсаалт гарна. Харин БНСУ-д очиж казинодсон гарууд гэвэл хамгийн сүүлийн нэр дэвшигч Б.Бат-Эрдэнээсээ эхлээд Я.Содбаатар, У.Хүрэлсүх, Ж.Мөнхбат гэсэн нэрс цааш нь хөвөрнө. Мэдээж тэд эднийгээ хөөж чадахгүй л дээ. Тиймээс эдгээр санаачилга нь хоосон яриа болж хувирна.

    МАН-ын өөр нэг чухал асуудал хэлэлцсэн гэж эх сурвалж мэдээлэв. МАН-даа аудитын шалгал хийлгэе гэжээ. Одоогийн санхүүгийн байдалдаа итгэхгүй байгаа бололтой. Одоогийн санхүү хариуцсан нарийн бичгийн дарга нь Т.Бадамжунай. Тиймээс түүний ажлыг шалгая гэсэн санаа л даа. Энэ мэтээр хурлынхаа үеэр олон чухал асуудал ярьсан байна. Түүнийг нь бид цувралаар хүргэх болно.