УИХ-ын гишүүн Н.Номтойбаяр, О.Содбилэг нараар ахлуулсан МАН-ын залуу гишүүд "Шинэчилье" хөдөлгөөн байгуулснаа өчигдөр албан ёсоор зарласан. Тэд нэр хүнд нь унаж буй намынхаа үйл ажиллагаа, бодлого зохион байгуулалт, төлөвлөлт, мөрийн хөтөлбөр цаашлаад одоогийн удирдлагуудыг шинэчлэх шаардлагатай хэмээн үзэж энэхүү хөдөлгөөнийг байгуулсан гэдэг. Тэд мөн намын бага хурлыг наадмаас өмнө хуралдуулах шаардлагыг намын удирдах зөвлөлийн гишүүдэд хүргүүлээд байгаа. Өчигдөр хуралдсан МАН-ын удирдах зөвлөлийн хурлаар шаардлагыг хүлээн авч асуудлыг шийдвэрлэнэ хэмээн тохиролцсон.  Тэд мөн шат шатны сонгуульд МАН ялагдал хүлээсэн нь намын удирдлагуудаас болсон гэж үзэж байгаа юм. Харин “Шинэчилье” хөдөлгөөн өчигдөр оройноос эхлэн Тусгаар тогтнолын ордны урд “Шинэчлэлийн өргөө” нэртэй гэр барьж ээ. Ямар учиртай гэр барьссаныг гэрт ажиллаж буй намын ажилтан Энхтүвшинээс тодрууллаа.

-    Намын удирдлагуудаа огцруулах шаардлагыг тавьж гэр барьсан тухай гадуур ярьж байна. Ямар учраас гэр  барив?

-    МАН-ын их, бага хурал хуралдах нь тодорхой болсон. Урьд урьдны хурлуудаас арай өөр хэлбэрээр хуралдах болов уу гэж бодож байна. Шинэчлэлийн хороо, шинэчлэлийн нэгдлүүдээс санаалчлаад гэр барьж энэ намыг дэмждэг гишүүд дэмжигчдээс удахгүй болох бага, их хурлаас ямар шийдвэр хүлээж байна вэ гэдгийг нь асууж байгаа юм. Иргэдийн өгсөн саналыг багцлаад бага, их хурал дээр уламжлах юм. Түүнээс биш хэн нэгнийг огцруулахыг шаардаж гэр бариагүй. Гаднах хаягнаас харвал тодорхой байгаа. МАН-ын бага, их хуралд орж чадахгүй иргэд маань ингэж ч болтугай дуу хоолойгоо хүргээсэй гэж бодож байна. Бид хүмүүсийн саналыг авахаар тусгайлан цаас бэлдсэн. Тэр цаасан дээр саналыг нь бичүүлж авч байна. Арай өөр хэлбэрээр хуралдахад нь тусалж байгаа юм.

-    Яагаад заавал энд барьж байгаа юм. Тусгаар тогтнолын ордон дотор өрөө олдоогүй юм уу?

-    Намын байраар хүмүүс их ирэх юм. Дотор байрлах газар байхгүй. Шинэчлэлийн хороо чинь  10 сар хөөцөлдөж байж сая нэг Тусгаар тогтнолын ордон дотор өрөөтэй болсон. Сарын 1.6 саяаар хөлслөөд суудаг. 

-    Иргэд хэр их орж ирж байна вэ?

-    Хүмүүс орж ирж байна аа. Санал бодлоо дуртай бичиж байгаа. Бид гэртээ нэмж ширээ байрлуулна.

-    Намын удирдах зөвлөлийн гишүүдээс орж ирж санал бодлоо хэлсэн үү?

-   Би өглөө 6.00 цагаас хойш энд жижүүрээр сууж байна. Намд ажилладаг хүмүүс орж ирээд гарсан. Тэд сайшаагаад дараа саналаа бичиж өгнө гээд гараад явсан. Гэхдээ том дарга нь орж ирээгүй. Ер нь энэ гэр МАН-ын шинэчлэлд тус болох зорилготой юм. Энэ гэрт улс төр ярихгүй, алдаа оноог хэлэлцэхгүй. Зөвхөн иргэд санал бодлоо л уламжлах юм.

-    Хэд хоног энд байрлах юм?

-   Бага хурал болтол байна. Гэхдээ энэ гэрт намын удирдлагууд, удирдах зөвлөлийн гишүүд рүү гээ ямар нэгэн хэлбэрээр дайрсан зүйл байхгүй.