МАН-ын Удирдах зөвлөлийн гишүүд өчигдөр хуралдаж намын Их, Бага хурлын урьдчилсан товыг гаргасан. Цаашлаад намын шинэчлэлийн асуудлаар ярилцаж санал бодлоо хуваалцсан байна. Удирдах зөвлөлийн хурал дээр яригдсан асуудлийг МАН-ын Ерөнхий нарийн бичгийн дарга Г.Занданшатараас тодрууллаа.

- МАН-ын удирдах зөвлөлийн өчигдрийн хурлаар ямар асуудал хэлэлцсэн бэ?

МАН-ын Удирдах зөвлөлийн гишүүд өчигдөр хуралдаж намын Их, Бага хурлын урьдчилсан товыг гаргасан. Гишүүд намын Бага хурлыг Улсын баяр наадмын дараа буюу 7-р сарын 20-ны үед хийхээр боллоо. Мөн Их хурлыг 9-р сарын сүүл, 10-р сарын эхээр хуралдуулахаар тохирлоо. "Шинэчилье" хөдөлгөөнөөс Бага хурлыг наадмын өмнө хийх хүсэлт тавьсан ч энэ жил олон аймгийн ой тохиож буй тул ийм шийдвэр гаргасан юм. Мөн өнгөрсөн Ерөнхийлөгчийн сонгуульд МАН оролцохдоо юун дээр алдсан, ямар асуудал дээр оносон талаараа хэлэлцсэн. Бас МАН-ын нэрийн өмнөөс төрийн өндөр албан тушаалд ажиллаж байхаа авлига, хээл хахуулийн асуудалд орооцолдсон хүмүүст ёс зүйн хариуцлага хүлээлгэх нь зүйтэй гэж бид үзлээ. Хэвлэлээр МАН-ынхан хоорондоо талцсан гэсэн мэдээлэл гарч байгаа. Тийм зүйл огт байхгүй. Өчигдөр залуучуудын төлөөлөл УЗ-ийн хурал дээр уриалга өгсөн. Бидний гаргаж буй санал санаачилга нэг юм. Харин яаж хамтарч ажиллах вэ гэдгээ хоорондоо ярилцаж байгаа. Тэгэхээр залуучуудаа хүлээж авахаас татгалзаж байгаа эсвэл шинэчлэл хийхийг хүсэхгүй байгаа зүйл огт байхгүй юм. Сонгуулийн үр дүнгийн хувьд 0.23 хувь буюу 2166 хүний саналаар манай нэр дэвшигч ялагдсан. Ямартай ч нэр дэвшигчийн хувьд маш сайн ажилласан. МАН-ын хувьд ч их идэвхтэй оролцлоо. Бидэнд ололт байгаагаас гадна ямар дутагдал байна, яаж илүү хүчирхэг болгох вэ гэдэг асуудлыг хамтын хүчээр ярьсан.

-    Шинэчилье гэдэг нэрийн дор яг ямар тодорхой асуудлыг тавиад байгаа юм бэ? Яг яаж шинэчилэх гээд байгаа талаар тодруулна уу?

-    Шинэчлэл бол тасралтгүй үйл явц. Бид Монгол улсын Ерөнхийлөгчид нэр дэвшүүлэх хүнээ ард иргэдээсээ асуусан. Энэ бол шинэчлэл байсан. Орон нутгийн сонгуульд нэр дэвшигчдийг анхан шатанд нь бие дааж шийдүүлэх эрхийг нь олгосон. Энэ бас шинэчлэл байсан. Ер нь нам хоорондоо сөргөлдөөд байх шалтгаан байхгүй. Эв нэгдлийн журмаар асуудлаа шийдвэрлэе гэж байгаа. Намын удирдлагын мөн залуусын түвшинд хоорондоо зөвшилцөж ойлголцохыг илүүд үзэж байгаа. Яг яаж шинэчлэх асуудлаа ч ярьж байна.

-     Намын даргаа өөрчлөх асуудал дээр ямар байр суурьтай байгаа вэ?

-  МАН-ын дүрмийн дагуу Монгол улсын Ерөнхийлөгчийн сонгуульд оролцсон дүнгээр намын удирдлагууд хариуцлага хүлээнэ гэсэн заалт байхгүй. Харин УИХ, орон нутгийн сонгуулийн дүнгээр намын удирдлагууд хариуцлага хүлээнэ гэсэн заалт байгаа. Гэхдээ энэ нь хариуцлагаас зугтаж байна гэсэн үг биш. Харин Авлигалын хэрэг бол улс төрийн аль ч намд байгаа. Энэ асуудлаа шийдэж авлигалтай шудрагаар тэмцэх ёстой гэсэн байр суурьтай байгаа.

-   Авлигын хэрэгтэй нэр холбогдсон намын гишүүдэд ёс зүйн хариуцлага тооцно гэж байна. Ёс зүйн хариуцлагыг яаж тооцох юм бэ? Танай намын нэр бүхий хүмүүс авлигалтай нэр холбогдсон. Тэдэнд ямар хариуцлага ноогдуулах вэ?

-    Ерөөсөө авлигал хээл хахууль бол нийгмийн гаж үзэгдэл байгаа юм. Шинэчлэлийн үед их өргөн дэлгэр тархсан. Үүнтэй тэмцэхийн тулд хөрс суурьтай нь тэмцэх хэрэгтэй. Улс төрийн намуудын санхүүжилтын хуулиас эхлээд тендерийн асуудал, төрийн оролцоо, улс төрчдийн ёс зүй, хариуцлага хүлээх хүртэл тэмцэх хэрэгтэй. Тиймээс МАН авлигатай тэмцэх тусгай хөтөлбөр гаргаж ажиллах нь зүйтэй гэж үзэж байгаа. Үүнийгээ намын их хурлаар хэлэлцүүлнэ. Аль ч намд эрх мэдэл, мөнгөнд ойрхон байгаа хүмүүс авлигалын хэрэгт холбогдож байна. Тиймээс бизнес, олигархийн бүлэглэлүүд нь бүх түвшиндээ шалгуулаад нэр цэвэрлүүлэх ёстой. Түүний дараа өөр асуудлууд яригдана.