Хуучны МАХН унаган нэрээ сэргээж МАН болсон биш хоёр хуваагдаж гурван сонгууль дараалан ялагдал хүлээв. Үүнийг шиг гунигтай тавилан МАН-д дахин тохиохоор болов. 

    Учир нь МАН шинэчлэгдэх гэсэн биш ахмад залуучууд хоёрынхоо хооронд гүн хагарал татчих шиг боллоо. Залуучууд нь ахмадууддаа бүх бурууг өгч эхлэв. Тэднийг хариуцлагаа үүрэх ёстой гэж байна. Бас "үе солигдох цаг ирлээ. Бидний цаг ирлээ. Ахмадууд минь зай тавьж өгөөрэй. Авлигалтай холбогдсоныг нь хөөцгөөе" хэмээх мессежүүдийг залуус эрчимтэйгээр тарааж байна.
  Харин хуучин бууны хугархай болсон “бурхинууд” амных нь салиа нь арилаагүй хүүхдүүдэд яалаа гэж зүгээр буугууд өгөх вэ дээ. Д.Лүндээжанцан “Азрагаа хурдан солиод байвал гүү сувиардаг” тухай сургаал айлдаж байхад Ц.Нямдорж залуучуудаа зориггүй болохыг зоригтойгоор нь хэлж байна. Эндээс ахмад залуус хоёрын дундуур У.Черчиллийн хэлдэгээр “төмөр хөшиг” татагдаж байгаа нь анзаарагдана. Ингээд бодлогогүй залуусынхаа хөдөлгөөн дээр бодлоготой ахмадуудын тоглолт орж ирвэл энэ намын шинэчлэл хагарал болж дуусах нь гарцаагүй юм.

   Саяхан МАН-аас нэр дэвшигч Б.Бат-Эрдэнэ “миний нэр цэвэр, миний гар цэвэр, миний сэтгэл цэвэр” гэж сурталчилж байгаад өөрийгөө хэн болохыг "ТҮ-9" ийн ганц сэтгүүлчээр илчлүүлсэн гэх. "ТҮ-9"-ийн сэтгүүлч залуугийн хийсэн нэвтрүүлэгээс монголчууд дархан аврагаа хэн болохыг дахин нэг таних шиг болсон. Гар, сэтгэл, нэр нь хэрхэн бохирдсоныг ч бүгдээрээ харсан.
   Үүн шиг ах нарыгаа авлигалчаар цоллоод байгаа “шинэчлэлийн” залуусын өөрсдийнх нь асуудлыг сөхвөл ч нилээд юм гарна. Авлигалчин гэгдээд байгаа ах нараасаа ч нэг их дутахгүй бололтой. Залуу хүмүүс хожим ах нарынхаа насан дээр ирэхдээ одоогийн “авлигалчин” гэгдээд байгаа хүмүүсийг хэд дахин нугласан хэрэг тарьсан байхыг үгүйсгэхгүй. Одоогийн шинэчлэл ярьж гүйгээд байгаа залуусын зарим нь Хадгаламж банкны 14 тэрбумын хэрэгт орооцолдож БНСУ-д казинодож явсныг олон хүн ярих болов. Бас шинэчлэл ярьж гүйгээд байгаа 4,5 залуу 2011 оны 7-р сард Сэлэнгэ аймгийн Хүдэр сумын ангийн отогт нэгэн эмэгтэйг ээлж дараалан хүчирхийлсэн тухай сахалтай залуугийн яриаг Монголчууд мартаагүй байгаа. Шинэчлэгчдийн зарим үйлдлийн талаар нүдэнд харагдтал ярьсан тэрхүү алдартай бичлэг цахим ертөнцөөс устаагүй. Ийм л ариухан залуус шинэчлэл хийнэ гэж зарлаад ах нараа авлигалчаар цоллоод байх нь шударга ариун үйлдэл мөн үү? хэмээн олон хүн асууж байна. Ах нар ч энэ мэт дуулиантай хэрэгүүдийг нь эргэж сануулах ажилд орсон сураг байна.

  Ийнхүү МАН-ын хөөрүү залуусын яаруу байдал шинэчлэх биш нураах шинж рүүгээ оров. Энэ намынхан одоо авлигачин, авлигачин биш хөгшин, залуу, хот, хөдөө, бүлэг фракц гээд олон зүйлээрээ талцан өрсөлдөхөөр боллоо.