самдан (122.201.18.166)

Өмнөговь аймгийн ИТХ-ын ээлжит гуравдугаар хуралдаан хуралдаж байна. Хуралдаан өглөөний 09 цагт эхлэх байсан боловч зарим шалтгааны улмаас хойшилж үдээс хойш 15.30 цагт эхэлсэн. Энэ удаагийн хуралдаанаар найман асуудал хэлэлцэхээр төлөвлөсөн. Хуралдаан эхэлмэгч төлөөлөгчдөөс өөр нэмж асуудал хэлэлцэх эсэх талаар санал хураахад ИТХ-ын төлөөлөгч В.Мөнхбатын зүгээс “аймгийн ИТХ-ын дарга Х.Түмэнбаярт итгэл хүлээлгэн цаашид ажиллуулах эсэх талаар хэлэлцье” гэсэн санал гаргалаа. Саналыг төлөөлөгчид зөвшөөрсөний дагуу намуудын бүлэг завсарлага авч хурал түр завсарласан. Аймгийн ИТХ-ын дарга Х.Түмэнбаяр завсарлагааны үеэр аймгийн ИТХ дахь Ардчилсан намын бүлэгт өөрийн хүсэлтээр чөлөөлөгдөх хүсэлтээ өгсөн байна. Үүний дагуу Ардчилсан намын бүлэг саналыг хүлээн авч ИТХ-д төлөөлөгч Л.Батчулууны нэрийг дэвшүүлсэн юм. Завсарлагааны дараа хуралдаан эхлэхэд Ардчилсан намаас ийнхүү санал дэвшүүлсэн бол МАН-ын зүгээс 10 минутын завсарлага авсан юм. МАН-ын бүлгийн ахлагч В.Мөнхбат үүнийг “Аймгийн ИТХ-ын даргад МАН-ын зүгээс нэр дэвшүүлэх зорилготой байсан боловч бид ярилцаад дэвшүүлэхээргүй боллоо” гэж тайлбарлалаа. Харин бусад нам болон төлөөлөгчдийн зүгээс нэр дэвшүүлсэнгүй, ингээд аймгийн ИТХ-ын даргад зөвхөн нэг төлөөлөгчийн буюу Л.Батчулууны нэрийг дэвшүүлж илээр санал хураахад олонхийн саналаар дахин сонгогдсон юм. Хуралдаанаар ИТХ-ын дарга Х.Түмэнбаяр шинээр сонгогдсон ИТХ-ын дарга Л.Батчулуунд тамга, тэмдгийг гардуулан өгч ажлын амжилт хүслээ.