Хэдхэн хоногийн өмнө МАН-ын даргын зөвлөх Б.Энхбаяр гэх залуу “МАН-ын дүрэмд Монгол улсын Ерөнхийлөгчийн сонгуульд оролцсон дүнгээр намын удирдлагууд хариуцлага хүлээнэ гэсэн заалт байхгүй. Зөвхөн УИХ болон орон нутаг гэсэн байгаа, дүрмээ уншаарай” хэмээн зарлаж явсан. Энэ үйл явдлын дараа МАН-ын Ерөнхий нарийн бичгийн дарга Г.Занданшатар хэвлэлийн хурал хийхдээ “Ямар нэг хүн өөрчлөгдсөнөөр шинэчлэл болохгүй” хэмээн тунхагласан юм. Тэгвэл өчигдөр болсон МАН-ын УЗ-ийн хурлаар Ерөнхийлөгчийн сонгуульд ялагдсанаар удирдлагууд хариуцлага хүлээнэ гэсэн заалт байхгүй талаараа бас ярилцжээ.

  Мөн МАН-ын дарга Ө.Энхтүвшинд “Манай намд ийм заалт байхгүй, даргаа та ажлаа үргэлжлүүлж хийх ёстой. Та дэвшсэн бол ялах байсан. Б.Бат-Эрдэнэ хүч тэнцвэргүй сонгуульд сайн л санал авлаа шүү дээ” хэмээн хэлэх хүмүүс олон байгаа гэнэ. Ө.Энхтүвшин ч гэсэн цагаан дээр хараар бичсэн намын дүрмийн энэ заалтыг сайн сурталчилахыг өөрсдийн хүмүүстээ даалгажээ. Тэр ч бүү хэл МАН-ын дарга ойр дотныхоо хүмүүст “Ерөнхийлөгчийн сонгуульд оролцсон дүнгээр намын удирдлагууд хариуцлага хүлээнэ гэсэн заалт байхгүй” талаар тайлбар хийж яваа сураг байна.
  Үүний илрэл болгож МАН-ын Ерөнхий нарийн бичгийн дарга Г.Занданшатар өчигдөр ярилцлага өгөхдөө “МАН-ын дүрмийн дагуу Монгол улсын Ерөнхийлөгчийн сонгуульд оролцсон дүнгээр намын удирдлагууд хариуцлага хүлээнэ гэсэн заалт байхгүй. Харин УИХ, орон нутгийн сонгуулийн дүнгээр намын удирдлагууд хариуцлага хүлээнэ гэсэн заалт байгаа” хэмээх супер гаргалгаагаа тайлбарлав.
  Ийнхүү МАН-ын удирдлагууд Ерөнхийлөгчийн сонгуульд ялагдлаа ч хариуцлага хүлээхгүй гэсэн намын заалтаараа гул барин суудалдаа үлдэхээр ярилцаж эхэллээ.

  МАН-ын дарга Ө.Энхтүвшингийн хувьд ийм тайлбарыг хэлээд сууж байх бүрэн эрхтэй хүн л дээ. Түүнд ажиллах боломжийг МАН-ын бүлэглэлүүд олгосонгүй. Үүнийг олон үндэслэлээр тайлбарлаж болно.
Нэгд: Түүний багт дандаа У.Хүрэлсүхийн залуус байгаа. Тэд Ө.Энхтүвшингийн бодлогыг явуулах сонирхол багатай байж мэднэ. Тийм ч учраас хариуцлага хүлээх учиртай залуус нь хамгийн түрүүнд шинэчлэл ярьж огцрохыг шаардаж олуулаа нэгдэж байгааг ард түмэн харж байна.
Хоёрт: Хамгийн сүүлд л гэхэд өөрийн хүнээ нарийн бичгийн дарга болгоё. Багаа бүрдүүлье гэхэд нь МАН-ын бага хурлын гишүүд унагаж орхисон юм. Өөрөөр хэлбэл дарга нь сэтгэл нийлсэн багатай ажиллая гэхэд гишүүд нь “үгүй” гээд байсан юм.
Гуравт: Намын дарга хүний хувьд хариуцлагаа хүлээж Ерөнхийлөгчийн сонгуульд өрсөлдье гэхэд У.Хүрэлсүхийн бүлэглэл эсрэг ажиллаад зөвшөөрөөгүй гэдэг. Нэгэнт нэр дэвшээгүй байж унасан хүний өмнөөс хариуцлага хүлээнэ гэж юу байсан юм. Угаасаа нэр дэвшээд МАН-ын даргын хувьд хариуцлагаа хүлээе гэж хоёргүй нэг утгаар хэлээд байхад нь “хэрэггүй ээ” гэсэн шүү дээ. Ийм байхад нэр дэвшүүлээд унагасан Б.Бат-Эрдэнийн өмнөөс Ө.Энхтүвшин хариуцлага хүлээнэ гэдэг бол арай л хатуудсан тохуурхал л даа.
Дөрөвт: МАН-ын дүрмэнд угаасаа УИХ-ын болон орон нутгийн сонгуульд ялагдсан тохиолдолд л удирдлагууд нь хариуцлага хүлээнэ гэсэн болохоос биш  Ерөнхийлөгчийн сонгууль гэж заагаагүй аж. Намын ийм дүрэм байхад яалаа гэж ажлаа өгье гэхэв. Дүрэмээ л дагах гэж нийт гишүүдээрээ баталсан шүү дээ. Тиймээс одоо гишүүд нь даргадаа дүрэмээс гажсан шаардлага тавих нь утгагүй юм.

   Ийнхүү Ө.Энхтүвшин суудалдаа үлдэх бодолтой байх шиг байна. Нөхцөл байдал ч түүний буруугаас болоогүйг олон нийт ойлгож эхэлсэн. Түүнийг энэ мэтээр ойлгож болох олон шалтгаан бий. Тэр Сү.Батболд, У.Хүрэлсүх шиг хариуцлагаа хүлээгээд ажлаа өгье гэж хэлж болохгүй олон шалтаг, шалтгаанаа эргэцүүлж суугаа гэж эх сурвалж мэдээлэв. Нам нь Ерөнхийлөгийн сонгуульд ялагдсанаас хойш чимээгүй байгаа дарга Ө.Энхтүвшин тун удахгүй гаргалгаа, үндэслэл сайтай чамбай гэгч мэдэгдэл хийхээр зэхэж буй сураг байна.