МАН-ынхан сонгуульд ялагдсныхаа дараа хэн нэгний бурууг хайдаг, залуус нь сонгуульд удирдсан дарга нараа огцруулна гэж сүрийг үзүүлдэг нь хэвшил болжээ. Тэр нь ч зөв. УИХ-ын сонгуульд ялагдал хүлээсний дараа намын дарга Сү.Батболд, ерөнхий нарийн бичгийн дарга У.Хүрэлсүх нар ажлаа өгч хариуцлагаа хүлээсэн. Гэхдээ тэд жинхэнэ ёсоороо хариуцлага үүрээгүй ажлаа өгсөн болоод асуудлаас мултарсан гэдэг. Тэгвэл энэ жилийн Ерөнхийлөгчийн сонгуульд муу оролцсныхоо хариуцлагыг хэнд үүрүүлэх вэ гэдэг МАН-ын УЗ-ын шүдний өвчин болоод байна. Хариуцлага үүрээд ажлаа өгчих хүн байхгүй, залуучууд нь шахаж шаардаад байдаг. Харин саяхан болсон МАН-ын Удирдах зөвлөлийн хурлаар Б.Бат-Эрдэнэ Ерөнхийлөгч болж чадаагүй, нам ялагдсны шалтгаан нь зарим намын хороо муу ажилсантай холбоотой гэсэн дүгнэлт хийжээ.
    Хуралд оролцсон гишүүд өөрсдийгөө чадлынхаа хэрээр нэр дэвшигчээ дэмжсэн, санхүүгийн асуудал, нийгмийн дэмжлэг үнэхээр хүнд байсан гэдгийг хэлж. Гэхдээ намын зарим хороо сэтгэл гаргаж идэвхитэй ажиллаагүй гэдгийг ч нуугаагүй аж. Ялангуяа УИХ-ын отгон гишүүн Д.Сумъяабазар Сонгинохайрхан дүүргийн намын хороог хөдөлгөж чадаагүй гэсэн шүүмжлэл хүртсэн байна.

  Учир нь Д.Сумъяабазарын сонгогдсон, хариуцаж авсан Сонгинохайрхан дүүргийн намын хороо сонгуулийн сурталчилгааны ид үеэр мөнгөгүй гээд суучихжээ. АН-ын нэр дэвшигчийн сурталчилгааны материал нэг айлд хэд хэдээрээ ирсэн байхад Б.Бат-Эрдэнийн материал ердөө ганц, хоёрхон удаа тараагдсан аж. Зарим айлд ч очоогүй тухай Сонгинохайрханы иргэд дуулгажээ. Уг нь энэ дүүрэгт 124 мянган сонгогч бий. Сонгочдынхоо тоогоор Улаанбаатар хотын хэмжээнд Баянзүрх дүүргийн дараа орно. Хэрвээ УИХ-ын сонгуульд ялалт байгуулсан чигээ барьж ажилласан бол Б.Бат-Эрдэнийн ялагдсан хувийг Ц.Элбэгдоржтой тун дөхүүлэх байжээ. Б.Бат-Эрдэнэ АН-ын нэр дэвшигчээс 102,414 саналаар дутсан. Сонгинохайрханы гэх мэт цөөхөн хороо  хүчээ гаргаж ажилласан бол Ц.Элбэгдоржтой тэнцэх цаашлаад илүү санал авах байсныг ч үгүйсгэхгүй байгаа аж.

  Уг нь Д.Сумъяабазар Үндэсний хөрөнгө оруулалтын банкны эзэн, бас бус хөрөнгө мөнгөтэй нэгэн. Ийм байж дахин сонгуулиар хүч гаргасан “ах” нарынхаа дэмжлэгийг хариулахгүй, гишүүний суудалтайгаа наалдаад хөдөлж өгөөгүй нь УЗ-ийн гишүүдийг багагүй бухимдуулсан бололтой. Түүний дүү Д.Дагвадорж АН-ын нэр дэвшигчийн сурталчилгаанд явж тун идэвхитэй ажилласан. Харин ах нь тийм байж чадсангүй.
  Гэсэн ч энэ сонгуульд ялагдсаны хариуцлагыг Д.Сумъяабазар ганцаараа үүрэхгүй нь тодорхой. Ямартаа ч намынхаа эсрэг ажилласан гэх түүнд УЗ-ын гишүүд эхний ээлжинд анхааруулга өгөөд өнгөрчээ.