Авлигачид МАН л байдаг гэсэн ойлголт үгүй болж байна. АН-д ч авлигачид олноороо шургалжээ. Өмч хувьчлалаас эхлээд томоохон тендерүүдийг сөхвөл АН-ын авлигачид МАН-ынхнаас давж л гарна уу гэхээс дутахгүй. Тэгвэл АН-ынхан авлигачидтайгаа тэмцэж эхэллээ. Гэхдээ энэ тэмцлээ Ерөнхий сайд Н.Алтанхуягийн хүнээр эхэлсэн нь ихээхэн анхаарал татаж байна хэмээн ажиглагчид дүгнэлээ.  

   Хамгийн сүүлийн мэдээлэлээр “Цэвэр агаар сан”-гийн захирал Н.Хүрэлсүх хэмээх хижээл эрийг АТГ-ынхан “цэргүүд”-ийнх нь хамт алдарт 461-р ангид хорьсон тухай шуугиж эхлэв. Гэтэл өчигдөр оройны зарим телевизийн мэдээлэлээр Н.Хүрэлсүх нь гадаадад гарч зугтсан гэнэ. Харин түүний нягтлангуудыг хорьсон гэсэн зөрүүтэй мэдээлэлийг түгээв. Ямар ч байсан нийслэлийн агаарын бохирдлыг бууруулах зорилгоор улсын төсвийн хөрөнгө, гадаадын зээл тусламжаар байгуулсан “Цэвэр агаар сан”-гийнхан АТГ-ынханы овоо хараанд өртжээ. Үнэхээр Н.Хүрэлсүх гадаадад гарч зугтсан бол эрх баригчид яаж авчирахаа мэдэж байгаа. Эрүүл мэндийн сайд Н.Хүрэлбаатарыг авлигалын асуудлаар шалгах гэтэл гадагшаа явчихсан. Тэгэнгүүт хүүг нь бариад хорьчихсон. Мэдээж Н.Хүрэлбаатар ирсэн. Үүн шиг Н.Хүрэлсүхийг ирэхгүй бол асуудалтай байгаа ах дүү нараас нь аваачаад Ганцад хийчихэд ирдэг гэдгийг хуулийнхан мэдэхтэйгээ байгаа байх.

   Тэгвэл шоронд хоригдсон, гадаадад гарсан гээд байгаа Н.Хүрэлсүх гэж хэн бэ? Гарал угшлын хувьд хаанахын хүн бэ гэдэгийг судалж үзлээ. Энэхүү эрхэм Ховд аймгийн уугуул иргэн аж. Бүр тодруулбал У.Барсболдтой тун дотно холбоотой гэж эх сурвалж мэдээлэв. Гэхдээ нам өөр аж. Н.Хүрэлсүх нь Ерөнхий сайд Н.Алтанхуягийн тун ойрын хүн гэнэ. Мэдээж Алтангадас фракцийнх. Н.Алтанхуяг тэргүүн шадар сайд байхдаа Ховдынхны оролцоотойгоор “Цэвэр агаар сан” хэмээх мөнгөтэй газрын захирал болгожээ. Н.Хүрэлсүх нь цагтаа  АН-аас Ховд аймагт нэр дэвшиж байж. Шинэчлэлийн Засгийн газар байгуулагдахад өөр албанд очих гэж хирдээ зүтгэж явсан гэнэ. Н.Алтанхуяг ч зүтгүүлж байж. Харин бусад бүлэглэлүүд нь зөвшөөрөөгүй учир асуудалтай газартаа үлджээ.
Үйл явдлыг эргэн сөхвөл тухайн үеийн Ерөнхий сайд Сү.Батболд хотын утааны асуудал хэлэлцсэн нэгэн хурал дээр “Цэвэр агаар сан”-гийн үйл ажиллагааг ихээхэн шүүмжилж хөрөнгө мөнгө нь хаашаа яваад байгаа нөхөр Н.Хүрэлсүхээс асууж зураглахын зэрэгцээ ажлаа хийж чаддаг хүнд нь өгөхийг хатуухан сануулж байж. Мэдээж Н.Алтанхуяг тааламжтай байсангүй энэ үйлдэлд. Энэ үйлдлээс л болоод Сү.Батболд, Н.Алтанхуяг хоёрын харилцаа ихээхэн хөндийрсөн гэж эх сурвалж мэдээлэв. Тэгвэл Н.Хүрэлсүх хэмээх эрийн ажил нилээд эртнээс л асуудалтай байж дээ. Одоо Н.Хүрэлсүхийн хэрэгт холбогдуулан “Цэвэр агаар сан”-гийн ерөнхий нягтлан М.Хулан, түүний туслах нягтлан А.Болдмаа, мэргэжилтэн Б.Чимэд-Эрдэнэ, Д.Цэцэгээ нарыг цагдан хорьжээ. Тэднийг гурван тэрбум гаруй төгрөгийн асуудалтай холбогдуулан шалгаж эхэлжээ. Эдгээр эрхэмүүд албан тушаалаа урвуулан ашиглаж, иргэдийн болоод төсвийн хөрөнгийг завшсан гэсэн асуудлаар сэжигтнээр татагджээ.  
Н.Хүрэлсүх нь нягтлангуудтайгаа нийлэн хувийн аж ахуйн нэгжүүд рүү мөнгө шилжүүлээд буцааж авч ашиглах талаар нилээд гаршсан гэж үзээд байгаа аж. Тиймээс түүний төсвийн хөрөнгө шилжүүлж хамтран мөнгө угаадаг байсан аж ахуйн нэгжүүдийг нь ч гэсэн давхар шалгаж эхэлжээ.

     МИАТ-ийнхан угаасан мөнгөө үл хөдлөх хөрөнгө болгосон гэж шуугисан. Тэгвэл “Цэвэр агаар сан”-гийнхан ч адилхан төсвийн хөрөнгөнөөс шилжүүлсэн мөнгөө эргүүлэн авч, үл хөдлөх хөрөнгө худалдан авдаг байна. Үндсэндээ гурван тэрбум гаруй төгрөгөөр үл хөдлөх хөрөнгө авсан гэхээр овоо олон байрны сураг гарах шинжтэй болоод явчихав. Удахгүй хуулийнхан тооллого хийж тоог нь зарлах биз дээ.

   Ийнхүү АН-ынхан гаднаа цэвэрлэгээ хийхийн зэрэгцээ дотроо бас авлигатайгаа тэмцэх гэж зорьж байна. Ингэх хоёр шалтгаан байгаа аж. Нэгд олон нийт зөвхөн МАН-ынханыг л шалгаад байна. Танай намд ч авлигачид байгаа биз дээ гэж олон удаа асууж байгаа. Саяны ерөнхийлөгчийн сонгуулиар ч энэ асуудал хамгийн их яригдсан. Ямар сайндаа С.Баяр нэгэнтээ “Авлигатай тэмцээд байна уу, Ардын намтай тэмцээд байна уу” хэмээн онцолж хэлэх вэ дээ. Тэгвэл тийм биш гэдгээ эрх баригчид харуулах гэж хичээх нь.
   Нөгөө нэг шалтгаан нь ардчилагчид намын дарга Н.Алтанхуягаараа оролдоод эхэллээ. Удахгүй түүгээр сор залах гэж байгаа тухай яриа гарч эхэлсэн. Түүний эхлэл нь энэ үйл явдал биз. Тиймээс Н.Хүрэлсүхийг хорьсон явдал бол нэг талаасаа авлигатай тэмцэж байгаа юм шиг боловч нөгөө талаасаа Н.Алтанхуягтаа сануулга өгч буй үйлдэл байж болно.