МАН-д “Шинэчилье” нэртэй залуусын фракц байгуулагдсан. Тэд намаа шинэчлэх зорилготойгоо зарлаж, нилээд хэдэн шаардлагуудыг удирдлагууддаа өргөн барьсан. Өнгөц харвал мундаг шинэчлэгч залуучууд гэж ойлгогдохоор. Өнгийж үзвэл өөр зорилготой гэдэг нь мэдрэгдэхээр үйл явц өрнөж байна.

Тэд намаа шинэчлэх гэж биш сонгуульд ялагдсан намынхаа удирдлагад очихоор нэгджээ. Учир нь тэдэнд шинэчлэлийн үзэл санаа, бодлого төлөвлөгөө концепци ч байхгүй. Харин ганцхан дарга болох гэнэхэн мөрөөдөлтэй гэж эх сурвалж үйлдлийг нь тайлбарлав. Бас өөрсдийгөө 1980 оны төлөөлөл хэмээн тодотгож, намынхаа ахмадуудыг бас 1970 оныхоо ах нарыгаа үл тоож олонхоороо түрээ барьж байгаа юм. Тийм ч учраас ахмадууд болоод ах нарынхаа өмнүүр орж удахгүй болох их хурлаараа намынхаа удирдлагад очих төлөвлөгөө боловсруулсан сураг байна.

Эх сурвалжийн мэдээлж байгаагаар бол 1980 оны төлөөлөл МАН-ынхаа Ерөнхий нарийн бичгийн дарга дээр нэмээд таван нарийн бичгийн даргыг өөрсдийн хүмүүсээр бүрдүүлнэ гэж тооцсон сураг байна. “Шинэчилье” залуусын фракцынхны тооцож байгаагаар бол Ж.Мөнхбатыгаа Ерөнхий нарийн бичгийн дарга болгох төлөвлөгөө боловсруулжээ. Саяхан энэ залуу намын Удирдах зөвлөл болоод Нарийн бичгийн даргаасаа сайн дураараа татгалзаж байна гэж шоудсан нь шоу биш бодлого байжээ. Улс төрийг бохир гэдэг нь Ж.Мөнхбатын санаархалаар батлагдана. Энэ залуу хэдхэн жилийн өмнө л Г.Занданшатараар хөтлүүлчихсэн явдаг байсан. Одоо харин Г.Занданшатараараа туг тахиж албыг нь булаах гэж санаархаж байгааг улс төр гэж цагаатгах уу эсвэл МАН-ын залуусын жудаг гэж ойлгох уу? Тайлбарлахад төвөгтэй л үйлдэл юм даа. Бас энэ хоёр эрхмийг алдарт казиногийн дуулиан нэгтгэж бас салгадаг байж болох юм.

Ж.Мөнхбатыг Ерөнхий нарийн бичгийн дарга болвол дараагийн таван нарийн бичгийн дарга ч бэлэн гэнэ. Н.Номтойбаярыг залуучуудын асуудал хариуцсан орон тооны бус нарийн бичгийн даргаар О.Содбилэгийг парламентын асуудал хариуцсан орон тооны бус нарийн бичгийн даргаар томилно гэж ярилцжээ. Мөн орон нутгийн асуудал хариуцсан нарийн бичгийн даргаар Б.Амарсанаа, Хэвлэл мэдээлэл, олон нийтийн харилцааны асуудал хариуцсан нарийн бичгийн даргаар Д.Амарбаясгалан, Хот байгуулалтын асуудал харицсан нарийн бичгийн даргаар Т.Аюурсайхан нарыг томилно гэсэн яриа гарчээ. Өөрөөр хэлбэл 1980 оныхон Ерөнхий нарийн бичгийн даргаас гадна орон тооны гурав, орон тооны бус хоёр нарийн бичгийн даргыг авахаар санаархаж байгаа бололтой. Мэдээж эдгээр орон тооны болон орон тооны бус нарийн бичгийн дарга нар автоматаар МАН-ынхаа Удирдах зөвлөлд ордог аж. Тэгэхээр эдгээр залуус нэг биш хоёр том ажилд томилогдох нь гэж ойлгож болох юм. Одоогийн байдлаар МАН-д орон тооны болон орон тооны бус 10 орчим нарийн бичигийн дарга байдаг. Тэдний ихэнхи нь ийнхүү залуучуудын мэдэлд шилжиж мэдэхээр болов.

Үүгээр ч зогсохгүй Намын байгуулалт, хэвлэл мэдээлэл, хүний нөөцийн гэсэн гурван ч хэлтсийг авах нь бодлогын хувьд зөв гэж ярилцсан сураг байна. Тэдгээр газар хэлтсүүдэд Б.Ганхуяг, Н.Батсүмбэрэл, Б.Цогтгэрэл гэх мэт хүмүүсээ томилж болох тухай саналууд гарчээ.

МАН-аа сонгуульд ялагдсаны дараа гэнэт л эрчимтэй гарч ирсэн залуус сүүлийн өдөрүүдэд чимээгүй болсон. Эх сурвалжийн мэдээлж байгаагаар бол тэд нуувчиндаа орж энэ мэтээр намын удирдлагад залуусаа гаргахаар төлөвлөгөөгөө ярилцаж байгаа аж. 

Ийнхүү У.Хүрэлсүхийн залуусыг МАН-даа эрчимтэй шинэчлэл хийж ирэх жилүүдэд төрийг барилцах хэмжээнд хүргэх реформ хийх үү, эсвэл энэ намын ариун голомтыг самрах уу гэдэгийг дүгнэхэд арай эрт байна. Ямар ч байсан үйл явдал иймэрхүү байдлаар өрнөж байгаа сураг гарлаа.