Сүүлийн үед ШӨХТГ-ын дарга О.Магнайг овоо сайн ажлаа хийдэг хэмээн олон нийт ам сайтай байгаа. Тийм ч учраас олон аж ахуйн нэгжүүдийг хуулиа биелүүлсэнгүй гэж шахаж шаардахад ард түмэн О.Магнайг дэмжиж ирэв.

Ард түмний энэ дэмжлэгт тулгуурласан О.Магнай том, жижиг аж ахуйн нэгжээс эхлээд олон байгууллагыг хууль биелүүлэхийг сануулж, хуулиа биелүүлэхгүйг нь торгож сүрийг үзүүлэх болсон.

Хамгийн сонирхолтой нь бусдыг хууль биелүүлэхийг шаарддаг О.Магнай дарга өөрөө хууль биелүүлэхгүй гэж хэлсэн нь ихээхэн анхаарал татах боллоо. Учир нь тэрээр өөрийн байгууллагын есөн байцаагчийг ажлаас нь халсан юм. Ажлаасаа үндэслэлгүй халагдсан гэж үзсэн есөн байцаагч Төрийн албаны зөвлөлд гомдол гаргасан байдаг. Уг асуудлыг Төрийн албаны зөвлөл авч хэлэлцээд хууль бусаар халсан нь үнэн гэж үзсэн учир ажилд нь эргүүлж томилохыг үүрэг болгожээ. Гэтэл Төрийн албаны энэ шийдвэрийг О.Магнай эсэргүүцэж биелүүлэхгүй гэж мэдэгдэв. Төрийн албаны зөвлөл хууль зөрчиж хүмүүсийг хоморголон халсан байна гэж үзээд байхад би тэгээгүй, шийдвэрийг чинь биелүүлэхгүй. Хэрэв тэднийгээ ажилд нь томилуулмаар байвал намайг явуулсныхаа дараа ажилд нь оруулаарай гэсэн утгатай юм яриад сууж байгаа хүнийг шударга сайн дарга гэж ойлгох уу? Үүнээс үүдээд бусад аж ахуйн нэгжүүд ч гэсэн О.Магнайгийн шийдвэрийг эсэргүүцээд эхэлвэл яахав. Та өөрөө хуулиа биелүүлдэгүй юм байна билээ. Хуулиа биелүүлдэг болчихоод бидэнд шаардлага тавьбал шударга сайхан шийдэл болно гэвэл ямар тайлбар хэлэх үү?

Төрийнхөө албаны зөвлөлийн шийдвэрийг хэрэгжүүлдэггүй хүн бусдыг хууль биелүүл гэж шахаж шаардах цаашдаа жаахан төвөгтэй л учрах байх. Ард түмэн ч О.Магнайгийн энэ үйлдлийг гайхаж байх шиг. Зарим нь энэ хүн чинь өөрөө хууль биелүүлэхгүй, төрийн албаны тогтоол шийдвэрийг хэрэгжүүлэхгүй гэж байна. Тэгвэл бид бас О.Магнайгийн шийдвэрийг хэрэгжүүлэхгүй байж болох нь ээ хэмээн ярих иргэдийн тоо ч нэмэгдэв.

Тэр ч бүү хэл О.Магнай “Төрийн албаны Цогоо гээд дарга нь надтай уулзах байлгүй дээ” хэмээн томорсон янзтай яриа өгөв. Адилхан агентлагийн даргын түвшний хүмүүс нэг нь нөгөөгөө дуудаж ингэж томрох хэрэг байсан уу? Цогоо гээд дарга нь тэгээд О.Магнайгийн хэлсэнээр уулзах гээд гүйх болов уу. Бараг л үгүй болов уу даа. Тэгвэл О.Магнай Төрийн албаны дарга Цогоог шударга бус шийдвэр гаргасан гээд бас шахаж шаардаж, шалгаж эхэлвэл юу болох вэ гэж гаргалгаа хийх ажиглагчид ч байна. Аливаа төрийн байгууллагын ажилчдыг хууль бусаар халсан тухай асуудлыг Төрийн албаны зөвлөлийн дарга ганцаараа мэдэж шийдвэр гаргадаггүй. Төрийн албаны зөвлөл гэж бий. Зөвлөлөөрөө хэлэлцээд шийдвэрлэдэг аж. Эндээс дүгнэж үзвэл О.Магнай Төрийн албаны зөвлөлийн гишүүдтэй ч авалцах бололтой.

Энэ мэтээр төрийн байгууллагуудын хоорондын зөрчил гүнзгийрч эхэлж байна. Нөгөөтэйгүүр төрийн байгууллагууд нэг нь нөгөөгийнхөө шийдвэрийг хэрэгжүүлэхгүй бол олон нийт ч төрийн зарим байгууллагын шийдвэрийг биелүүлэхгүй байх муухай жишигт хүрч мэдэх юм. Ийм муу жишгийн эхлэлийг хамгийн сайн ажиллаж байгаа гэгддэг О.Магнай дарга нь тавилаа.