Хүн амын хөгжил, нийгмийн хамгааллын яамны Төрийн нарийн бичгийн дарга Б.Отгонжаргалаар ахлуулсан ажлын хэсэг өчигдөр Гэр бүлийн тухай хууль, Хүүхдийн эрхийг хамгаалах тухай хууль, Гэр бүлийн хүчирхийлэлтэй тэмцэх тухай хуулийн шинэчилсэн найруулгын төслийг боловсруулах нэгдсэн уулзалт хэлэлцүүлэг зохион байгуулсан. Уг уулзалтын зорилго нь дээрх гурван хуулиудын шинэчилсэн найруулгын үзэл баримтлалыг нэгтгэн хэлэлцэж , саналаа солилцох, хууль хоорондын уялдаа холбоог тодорхойлох цаашид дээрх гурван хуулийн ажлын хэсгийн гишүүд энэ чиглэлээр хэрхэн хамтран ажиллах талаар чиглэлээ гаргахад оршсон.
Ажлын хэсгийн уулзалт, хэлэлцүүлгийн үеэр “Гэр бүлийн тухай хуулийн шинэчилсэн найруулгын тухай үзэл баримтлал” сэдвээр зөвлөх багш Д.Дүгэржав илтгэл тавьсан. Тэрбээр энэхүү илтгэлдээ гэр бүлийн харилцааны зарчим, түүнийг хэрхэн хангах, хэрэгжүүлэх аргын талаар танилцуулсан.
Тухайлбал, Гэр бүлийн дотоод асуудлыг гэр бүлийн гишүүд харилцан тохиролцож шийдвэрлэх зарчим, хүүхдийг гэр бүлд нь хүмүүжүүлэх, түүний сайн сайхан байдал, хөгжлийг эрхэмлэх, хүүхдийн дээд ашиг сонирхлыг хангах зарчмын тухай ажлын хэсгийн гишүүдэд танилцуулж, харилцан санал солилцсон. Мөн тогтвортой, гэр бүлийг дэмжих эдийн засаг, эрх зүй, сэтгэл зүйн орчныг бүрдүүлэх хэд хэдэн арга байгааг ч хэлсэн. Энэ нь эдийн засаг, нийгмийн сэтгэл зүй, улс төрийн гэсэн арга юм.
Харин Хуулийн төслийг боловсруулах ажлын хэсгийн гишүүн Д.Энхжаргал “Гэр бүлийн хүчирхийлэлтэй тэмцэх тухай хуулийн үзэл баримтлал” сэдвээр өөрийн илтгэлээ танилцуулсан. Түүний танилцуулснаар Гэр бүлийн хүчирхийлэлтэй тэмцэх тухай хууль 7 бүлэг, 35 орчим зүйлтэй байхаар боловсруулсан байна. Хуулийн гол үзэл баримтлал нь Гэр бүлийн хүчирхийллээс урьдчилан сэргийлэх, гэр бүлийн хүчирхийллийг мэдээлэх, илрүүлэх, таслан зогсоох, хамгаалалтын арга хэмжээ авах, гэр бүлийн хүчирхийллийн талаар шүүхэд гомдол, хүсэлт гаргах, шийдвэрлэх ажиллагаа, хүүхдийг гэр бүлийн хүчирхийллээс хамгаалах, гэр бүлийн хүчирхийллийн хохирогчдод үзүүлэх үйлчилгээ, дэмжлэг, хариуцлага гэсэн хэсгээс бүрдэх юм байна.
Гэр бүлийн тухай хууль, Хүүхдийн эрхийг хамгаалах тухай хууль, Гэр бүлийн хүчирхийлэлтэй тэмцэх тухай хуулийн шинэчилсэн найруулгын төслийг боловсруулах ажлын хэсгийн нэгдсэн уулзалт, хэлэлцүүлэг зохион байгуулагдсан нь дээрх гурван хуулийн шинэчилсэн найруулгын ажлын хэсгийн гишүүд хууль тус бүрийн шинэчилсэн найруулгын үйл ажиллагааны явцтай танилцах , мэдээлэл солилцох , нэгдсэн ойлголттой болох , цаашид ажиллах төлөвлөгөө саналууд гарах ач холбогдолтой болсоныг ХАХНХЯ-ны Төрийн нарийн бичгийн дарга Б.Отгонжаргал онцолж, хуулийн төслийн талаар байнгын харилцан мэдээлэл солилцож, зөвлөлдөж байхыг хүсэн, амжилт хүслээ.
