Эрүүл мэндийн яамны өмнөх сайд нь их хэмжээний мөнгөний хэргээр саатуулагдаад удаагүй байхад дахин нэг шуугиан дэгдлээ. Тус яамны төрийн нарийн бичгийн дарга Ж.Хатанбаатарыг ажлаас халах тухай яригдаж эхэллээ.

       Эрүүл мэндийн яамны өмнөх сайд нь их хэмжээний мөнгөний хэргээр саатуулагдаад удаагүй байхад дахин нэг шуугиан дэгдлээ. Тус яамны төрийн нарийн бичгийн дарга Ж.Хатанбаатарыг ажлаас халах тухай яригдаж эхэллээ. Түүнийг зарим тусгай мэргэжлийн төвүүдийн захирлыг томилох ажилд хууль бусаар оролцсон, ажилдынхаа дунд хов жив тараадаг тул ажлаа тэнцэхгүй гэж ГССҮТ-ийн дарга Л.Жамбалжав хэвлэлийн хурал хийж мэдэгдэв. Харин учир байдлыг Эрүүл мэндийн яаманд ажилладаг эх сурвалж өөрөөр тайлбарлаж байна.

   Саяхан Ерөнхийлөгчийн сонгуулийн ажил нь дуусаад яамдаа анхаарч эхэлсэн Н.Удвал сайд эмнэлгийн захирлуудын сонгон шалгаруулалтанд “гар дүрж” эхэлсэн нь энэ аж. Хэвлэлийн хурал хийсэн Л.Жамбалжав бол Н.Энхбаярын “эмч” гэдгээр нь хүмүүс мэддэг билээ.
   Төрийн албаны зөвлөлийн салбар зөвлөлөөс харьяа зарим тусгай мэргэжлийн төвүүдийн захирлын албан тушаалд томилогдох ажилтныг сонгох шалгалтыг 2013 оны 7 дугаар сарын 05-ны өдөр буюу өчигдөр авахаар албан ёсоор зарласан байна. Гэтэл 2013 оны 7 дугаар сарын 03-ны өдөр Эрүүл мэндийн сайд Н.Удвал Төрийн албаны зөвлөлд Ж.Хатанбаатарыг ЭМЯ-ны ТНБД-ын албан тушаалаас чөлөөлөх асуудлыг Засгийн газарт тавьсан учир сонгон шалгаруулалтыг хойшлуулж өгнө үү хэмээн хүсэлт гаргасан байна. Харин Төрийн албаны зөвлөлөөс Сонгон шалгаруулалтыг хойшлуулах боломжгүй гэдгийг албан ёсоор 2 ч удаа мэдэгдсэн байдаг аж. Ямар нэгэн байдлаар сонгон шалгаруулалтыг хойшлуулахаар улайрч байгаа тэд янз бүрийн арга сэдэж байгаа гэв. Өчигдөр орой буюу 2013 оны 7 сарын 04-ны өдрийн орой ажил тарсан хойно Сонгон шалгаруулалтыг зохион байгуулах комиссын дарга Д.Оюунцэцэг гэх ЭМЯ-ны Хэлтсийн дарга эмэгтэй Төрийн албаны зөвлөлд хандан: “Эрүүл мэндийн сайд Н.Удвал сонгон шалгаруулалтыг хойшлуул гэж мэдэгдсэн, тиймээс сонгон шалгаруулалтыг явуулах боломжгүй байна. Би комиссын даргын үүрэгт ажлаас чөлөөлөгдөх хүсэлтээ гаргаж байна” хэмээжээ. Тэрээр Н.Удвал авхайг Эрүүл мэндийн Дэд сайдаар 2000-2004 онд ажиллаж байх үед нь туслахаар нь ажилладаг байсан бөгөөд одоогийн сайдын үүрэг, даалгаварыг үг дуугүй дагахаас өөр аргагүй “толгойгүй” хүн. Тэгээд энэ тухайгаа буюу сонгон шалгаруулалт явуулах боломжгүй тухайгаа орой 22 цагийн алдад шалгалтанд орох хүмүүс рүү залгаж хэлсэн байдаг. Комиссын бүрэлдэхүүнгүй бол шалгалтыг явуулах боломжгүй байдаг. Гэтэл Төрийн албаны зөвлөлөөс Сонгон шалгаруулалтад орох хүмүүс рүү утасдан өглөө 8 цаг 30 минутанд ирж шалгалтаа өгөхийг мэдэгдсэн байна. Ингээд Төрийн албаны зөвлөлийн төв байранд сонгон шалгаруулалтад бүртгүүлсэн нийт 15 хүн ирсэн байна. Нөхцөл байдал ийм болсон тул ЭМЯ-ны дэргэдэх Төрийн албаны салбар зөвлөлийн дарга Ж.Хатанбаатар Төрийн албаны төв зөвлөлийн гишүүдтэй хамтран шуурхай хуралдаан зохион байгуулж сонгон шалгаруулалтанд орох иргэдээс санал авчээ. Санал хураалтыг ил авсан бөгөөд тэдгээр иргэд 100 хувийн саналаар шалгалтаа товлосон хугацаанд нь өгөх хүсэлтээ илэрхийлсэн учраас хуулийн дагуу сонгон шалгаруулалтыг зохион байгуулахаар болсон бөгөөд удаа дараа ингэж гадны нөлөөтэй хойшилж байгаад төрийн албан хаагчдын хувьд дургүйцэж байгаагаа илэрхийлсэн байна.
      Хуулийн хүрээнд бол тухайн салбарын Сайд хийгээд Төрийн нарийн бичгийн дарга хэн байхаас үл хамааран сонгон шалгаруулалтыг явуулж лавлагаа төвүүдийг эзэнтэй болгох шаардлага чухал байна. Гэтэл төрийн албаны үйл ажиллагааг явуулахад улс төрийн албан тушаалтан буюу салбарын Сайд хориг тавих эрхгүй байдаг. Төрийн жинхэнэ албаны үйл ажиллагааг хуулийн дагуу явуулахад саад учруулж, удаа дараа хууль бус шийдвэр гаргуулахыг шаардаж байсан Н.Удвал сайдын увайгүй үйлдэл хэрээс хэтрээд байгаа хэмээн эх сурвалжууд мэдээлж байна.