УИХ-д Б.Болор гэж гишүүн байдаг гэнэ. Тийм гишүүн байдгийг Архангай аймгийнхан л сайн мэддэг болохоос ард түмэн мэдэхгүй л дээ. АН-аас нэр дэвшиж ялалт байгуулсан улс төрч аж. Түүнийг ард түмэн мэдэж авах нэг том шалтаг гарч ирлээ. Учир нь Б.Болор гишүүн ард түмний бухимдлыг төрүүлсэн Үндэсний их баяр наадмын тухай хуульд нэмэлт, өөрчлөлт оруулах тухай хуулийн төслийг санаачлагч, хорыг хутгагч, гишүүдийг уруу татагч нь гэсэн яриа саарал ордноос гарлаа. Уг нь энэ хуулийг нэлээд цөөнгүй гишүүн санаачилсан ч гэсэн олон түмэн бухимдаад ирэхээр гишүүд Б.Болор гэгч нөхрийг зааж өгөөд бултаж эхэлжээ.

Ингэх учир шалтгаан байгаа аж. Б.Болор бөхөд нэлээд нугасгүй нэгэн гэнэ. Архангайн, Өвөрхангайн бөхчүүдтэй тун ойрхон байдаг аж. ГХ-ны дэд сайд байхдаа өрөөгөөрөө дүүрэн бөхийн зураг тавьж гадны дотныхонд гайхуулдаг байжээ. Харамсалтай нь гадны дипломатчууд гүзээ нь унжсан баахан шалдан эрчүүдийн зургийг хараад ердөө ч ойлгодоггүй байсан талаарх яриа энэ яамныхан дунд бий. Гадны төлөөлөгчид ирээд Б.Болор сайдын өрөөгөөр орохоор гадаад харилцааны бодлого биш бөхөө тайлбарладаг тухай онигоо шиг яриа байдаг аж. Түүний энэ байдлаас ГХ-ны яамныхан ихэд зовдог байсан тухай одоо л яригдаж эхэллээ.

Гадныханд гадаад харилцааны бодлого биш бөх ярьж айлгадаг байсан энэ залуу хар багаасаа Д.Мөнх-Эрдэнэ арслангийн улаан фэн байж. Тэгээд нөгөөдөх нь аварга болж чадсангүй. Харин наадамд түрүүлээгүй арслангаа хуулийн хүрээнд аварга болгож, нутгийн ах Г.Өсөхбаярыгаа дархан аварга болгох уран санаа олчихоод түүндээ Р.Гончигдорж, Г.Батхүү зэрэг эрх ашиг сонирхол, нутаг нуга нэгтэй гишүүдийг уруу татаж чаджээ. Ингээд хууль бодлого ярьдаггүй залуу гишүүн аварга төрүүлэх хууль санаачилчихаад ард түмний бухимдлыг төрүүлэн анхаарлын төвд орж ирэв. Гэвч түүний санаачилсан, УИХ-ын гишүүдийн лоббидсон хуульд Ерөнхийлөгч Ц.Элбэгдорж хориг тавилаа. Уг хуулийг батлахад дархан аварга Б.Бат-Эрдэнэ, М.Энхболд зэрэг олон гишүүд дургүй байжээ.

Б.Болор гишүүний санаачилга лоббигоор батлагдсан энэ хуулийн талаар өргөн шүүмжлэл өрнөж байна. Нэгд МҮБХ уг хуулийг дэмжихгүй гэнэ. Мэргэжлийн холбооноос нь ч санал аваагүй аж. Харин МҮБХ-ныхон энэ хууль хэрэгжвэл цолны эцэс төгсгөлгүй маргаан үргэлжилнэ гэж анхааруулсаар ирэв. Учир нь аварга, арслангуудад дүйцүүлээд цол өгдөг юм бол гарьд, заан, начин цолтой бөхчүүдийн амжилтыг үнэлж цол олгох ёстой гэж бөхчүүд нь өөрсдөө барьцаад эхэлжээ. Ингээд МҮБХ-ныхон дуугарсан хэрэг.

Мөн ШӨХТГ-ын дарга О.Магнай ч энэ хууль шударга бус байгаа талаар байр сууриа илэрхийлсэн. Хэдийгээр тэрээр хуулийг шударга бус байна хэмээн гомдоллож шалгах эрхгүй ч гэсэн “Ерөнхийлөгч наадмын хуульд хориг тавьжээ. Маш зөв. Хэн нэгнийг дархан аварга болгохын тулд хууль өөрчилдөг байх ёсгүй. Барилдаад барахгүй бол нутгийн нөхдүүдээр лобби хийгээд хуулийг өөрчлөөд авдаг жишиг тогтож болно” хэмээн болгоомжилсон юм. Ер нь барилдаж байх үедээ үнэн хүчийг үзүүлээд авч чадаагүй цолоо дараа нь хууль гаргуулж авна гэдэг бол ичмээр зүйл л дээ.

Ийнхүү Б.Болор гишүүд нутгаасаа дархан аварга болоод аварга төрүүлэх гэж байгаад ард түмний ихээхэн дургүйг хүргэчих шиг боллоо. Мэдээж үр дүнд нь Б.Болорын биш Г.Өсөхбаяр,  Д.Мөнх-Эрдэнэ хоёрын нэр хүндэд сэв сууна. Тус болох гэсэн биш ус боллоо гэж энэ дээ. Уг нь Г.Өсөхбаярт бол энэ цолыг хуулиар биш хүчээр түрүүлээд авах боломж дүүрэн бий шүү дээ. Ингээд Архангайчуудын хүчээр биш хуулиар аварга төрүүлэх гэсэн ажиллагаанд тавьсан Ерөнхийлөгчийн хоригийг УИХ удахгүй хэлэлцэж шийдвэр гаргах үлдлээ.