Ерөнхийлөгчийн сонгуулийн өмнө эв нэгдэлтэй юм шиг тоглолт хийж байсан шинэчлэлийн Засгийн газар дэнжигнэж эхэллээ. Хаа сайгүй дараагийн Засгийн тэргүүн хэн бэ гэсэн яриа эрчимтэйгээр түгж байна. Мэдээж ийм яриаг эгэл жирийн иргэн санаанаасаа зохиогоод ярихгүй нь тодорхой.
 
Үүнтэй зэрэгцээд шинэчлэлийн Засгийн газрынхан хоорондоо эв түнжин муутай байна. Н.Алтанхуягийн Засгийн газрын имижийг өргөж өгч байгаа залуусын нэг бол Хууль зүйн сайд Х.Тэмүүжин. Тэр эрх зүйн салбарт олон шинэчлэлийг эхлүүлсэн. Гэвч түүний шинэчлэлийн бодлого явахаа больжээ. Учир нь хууль зүйн салбарын шинэчлэлийг зогсоох гэсэн хүчин гараад ирж. Энэ тухай Хууль зүйн сайд Х.Тэмүүжин “Томилогдохдоо шинэчлэлийг дэмжинэ гэж ам гарчихаад, эрх мэдэлд очсоныхоо дараа зангаа хувиргаж, сандал ширээ, цол хэргэмд толгойгоо мэдүүлж, шинэчлэлийг эсэргүүцэж, ардчилалыг өмчлөх гэж оролдох тэр малыг тэвчих арга алга. Новш…” хэмээн цахим хуудастаа бичиж олны сонорт хүргэж байна.

Хууль зүйн сайдын шинэчлэлийн бодлогыг эсэргүүцэгч хэн бэ? Тэр тусмаа Хууль зүйн сайдын шүү! Бүх л хүчний байгууллагыг удирддаг тэрээр шинэчлэлийг эсэргүүцэгчийн өмнө хүчгүйдэж эхэлжээ. Хууль зүйн сайдыг ингэж хүчгүйдүүлдэг хүн хэн байж болох вэ? Мэдээж жирийн нэгэн жижиг гар биш нь тодорхой. Сөрөг хүчин МАН-ынхан биш нь ойлгомжтой. Тэгэхээр Засгийн газар дотроосоо, АН дундаасаа эсэргүүцэж байгаа болоод явчихлаа.

Зарим ажиглагчдын хэлж байгаагаар бол түүний удирддаг агентлагуудын дарга нарын нэг байж болох талтай. Угаасаа бүхий л агентлагуудын дарга нар нь шинэчлэлийг дэмжинэ гэж томилогдсон. Тэгээд томилогдсон хойноо зангаа хувиргаж, сандал ширээ, цол хэргэмдээ толгойгоо мэдүүлсэн байж болох юм. Хэрэв энэ таамаг үнэн бол Х.Тэмүүжин сайдын л буруу. Шинэчлэлийн өмнө мал царайлж, том бодлогыг явуулахгүй новж болж хөглөрөх этгээдийг газар дээр нь халж сольж чадахгүй бол сайд байхын хэрэг бий юу? Тайж нарыг загнаж чадахгүй бол ноён байгаад яадгийн гэсэн Орос ах нарын зүйр үг бий шүү дээ. 

Х.Тэмүүжингээс хамаагүй сул гэгддэг Н.Удвал ажил явуулахгүй байгаа төрийн нарийнаа шууд л хөөгөөд явуулчихлаа шүү дээ. Арга эв, ааш зангаараа сүрхий гэгддэг Я.Санжмятав сайд таарч тохирохгүй байгаа төрийн нарийнаа эвтэйхэн аргалаад өөр ажилд шилжүүлчихлээ. Н.Удвал шиг олон түмэнд зарлаж аархаж байгаад халж болно. Эсвэл Я.Санжмятав шиг үнэгэн залиар асуудлыг шийдэх гарц ч Х.Тэмүүжингийн өмнө бий.

Ийнхүү шинэчлэлийн Засгийн газрынхан нэг жил ч болоогүй ЗГХЭГ-ийн дэд даргаасаа гадна хоёр ч төрийн нарийнаар туг тахьчихав. Бас ээлжээ хүлээж байгаа олон агентлагийн дарга нар бий гэж эх сурвалж мэдээлэв.

Юутай ч гэсэн шинэчлэгч сайдын бухимдлыг төрүүлж, малаараа дуудуулсан эрхэм дарга нарын нэр удахгүй тодрох байх. Тэр үед шинэчлэлийн өмнө мал гэж дуудуулсан хүн ч гэсэн өөрийн байр суурь, учир шалтгаанаа илэрхийлэх биз. Харин жинхэнэ том босс байгаад Хууль зүйн сайдын бодлогын өмнө хөндөлссөн бол Н.Алтанхуягийн Засгийн газар сөрөг хүчний оролцоогүйгээр зам нь шуударлаа гэсэн үг юм.