Ардчилсан намын бүлгийн хуралдааны дараа бүлгийн дарга Д.Эрдэнэбат хэвлэлийнхэнд мэдээлэл хийв.  Тэрбээр “Манай намын бүлэг  чуулганы отгон хурлаараа улс орны 2013 оны нийгэм, эдийн засгийг хөгжүүлэх, Монгол хүн хөрөнгөтэй болохоос эхлээд олон чухал асуудал ярилцлаа. Энэ хаврын чуулган эдийн засгийн асуудлуудыг шийдсэн, жижиг дунд үйлдвэрийн орчныг шийдвэрлэсэнээрээ давуу талтай боллоо. Намрын чуулганаар бүтээн байгуулалтыг эрчимжүүлж, түүнийг хянахаас эхлээд Японы Засгийн газартай хийсэн гэрээ хэлэлцээрийг батлах хэрэгтэй байна. Мөн АН-ын бүлэг намрын чуулган дээр хэлэлцэх асуудлын жагсаалтыг гаргасан. Шийдвэрлэгдээгүй байгаа олон хууль бий. Тэдгээрийг батлахын тулд бусад намтайгаа хамтран ажиллах болно. Газрын тухай, сонгуулийн тухай хууль, өндөр настны тэтгэвэр тэтгэмжийг шийдэж өгөх хэрэгтэй байна. Засгийн газар, Хуульзүйн яамнаас өргөн барьсан Хууль хяналтын байгууллагын бүтэц зохион байгуулалтын эрхзүйн шинэчлэлийг хийж дууссан. Үүгээр Монгол Улс хүний эрхийг хамгаалах чиглэл рүү хуучин бүтцийг өөрчилж, цоо шинэ бүтэц рүү орж буйгаараа онцлог хууль эрхзүйн орчинтой болж байна. Төр нь төр шиг байдаг, хүний эрхээ хамгаалах зөв хуулийн орчин руу Монгол Улс орж байна" гэв.