Монгол Улсын Ерөнхийлөгчид улиран сонгогдоод буй Ц.Элбэгдорж нөгөөдөр тангарагаа өргөнө. Ерөнхийлөгчийн тангараг өргөх үйл явдалтай холбогдуулж өнөөдөр УИХ-ын Тамгын газар, Ерөнхийлөгчийн Олон нийттэй харилцах албанаас мэдээлэл хийлээ.
Тэрээр  Эзэн Чингис хааны цогцолборын өмнө ард түмнийхээ нүдэн дээр тангарагаа өргөх юм. Энэхүү үйл явдал төрийн далбааны өдөртэй давхцаж байгаа аж.

Ерөнхийлөгчийн тангараг өргөх ёслолын ажиллагааны хөтөлбөрийг танилцуулъя.

 10.00 цагт Сүхбаатарын талбайд төрийн далбааг залах ёслол болж дараа нь урлагийн арга хэмжээ болох аж.

11.10 цагт хүндэтгэлийн хуралдаан эхэлж тус хуралдааныг УИХ-ын дарга З.Энхболд удирдаж, Ц.Элбэгдорж Монгол Улсын Ерөнхийлөгчийн тангараг өргөх юм байна. Мөн ард түмний төлөөлөл бүрэн эрхээ хэрэгжүүлж эхэлсэн Монгол Улсын Ерөнхийлөгч Ц.Элбэгдоржид хандан баяр хүргэнэ. Үүний дараа Монгол Улсын Ерөнхийлөгч Ц.Элбэгдорж ард түмэндээ хандаж үг хэлнэ. Гурав дахь арга хэмжээ нь цэргийн парадаар үргэлжилж, өндөрлөх аж. Уг арга хэмжээнд ард түмний төлөөллөөс гадна гадаад, дотоодын зочид төлөөлөгчид олноор оролцох юм байна. Хоёр хөршөөс гадна АНУ, Герман, Франц зэрэг орноос төлөөлөгчид хүрэлцэн ирэх юм байна. Мөн энэхүү ёслолын арга хэмжээг нэр бүхий дөрвөн телевиз шууд дамжуулан орон даяар цацах бол 200 гаруй хэвлэл, мэдээллийн байгууллагын сэтгүүлч, зураглаач нар үйл явдлыг газар дээрээс нь шууд сурвалжлахаар болж, бүртгүүлжээ.

Ингээд Ерөнхийлөгчийн тангараг өргөх зардалд нийтдээ 400 орчим сая төгрөг зарцуулагдах тооцоо гарчээ. Гэхдээ төрийн далбааны өдөртэй энэхүү тангараг өргөх ёслол давхцсан нь нэг талдаа зардлыг бууруулсан гэж холбогдох албаны хүн онцоллоо. 2009 онд тангараг өргөхдөө 240 сая төгрөг зарцуулж байсан билээ.