Төрийн байгуулалтын байнгын хорооны 2013 оны 7 дугаар сарын 8-ны өдрийн хуралдааны тойм

Төрийн байгуулалтын байнгын хорооны хуралдаан 2013 оны 7 дугаар сарын 8-ны өдрийн 15 цагт Төрийн ордны “Б” танхимд хуралдав. Хуралдааныг Улсын Их Хурлын гишүүн, Төрийн байгуулалтын байнгын хорооны дарга А.Бакей удирдав.

Тус хуралдаанаар Улсын Их Хурлын 2013 оны 7 дугаар сарын 5-ны өдөр баталсан Үндэсний их баяр наадмын тухай хуульд нэмэлт, өөрчлөлт оруулах тухай хуульд Монгол Улсын Ерөнхийлөгч 2013 оны 7 дугаар сарын 8-ны өдөр бүхэлд нь хориг тавьсан асуудлыг хэлэлцлээ.

Байнгын хорооны хуралдаанаар асуудлыг хэлэлцэх явцад Улсын Их Хурлын гишүүн Д.Эрдэнэбат, Ж.Батзандан нар “Үндэсний уламжлалт наадмыг хуульчлах нь буруу иймээс хоригийг хүлээж авах нь зүйтэй” гэсэн санал гаргасан.

Монгол Улсын Ерөнхийлөгчөөс 2013 оны 7 дугаар сарын 5-ны өдөр баталсан Үндэсний их баяр наадмын тухай хуульд нэмэлт, өөрчлөлт оруулах тухай хуульд бүхэлд нь тавьсан хоригийг хүлээн авах эсэх асуудлаар санал хураахад Байнгын хорооны хуралдаанд оролцсон гишүүдийн дийлэнх олонх нь хүлээн авах нь зүйтэй гэж үзэв.

Байнгын хороо хоригийг хүлээн авах нь зүйтэй гэж үзсэн тул Үндэсний их баяр наадмын тухай хуульд нэмэлт, өөрчлөлт оруулах тухай хуулийг хүчингүй болсонд тооцох тухай хуулийн төслийг хэлэлцэх нь зүйтэй гэсэн санал хураалт явуулахад хуралдаанд оролцсон гишүүдийн дийлэнх олонх нь дэмжиж, уг хуулийн төслийг нэгдсэн хуралдаанд оруулах нь зүйтэй гэж үзлээ.