МАН-ын дарга асан Б.Даш-Ёндон хэвлэлд яриа өгсөн нь У.Хүрэлсүхийн залуучуудын зэвүү, дургүй хоёрыг зэрэг хүргэчих шиг боллоо. Учир нь У.Хүрэлсүхийн залуус өчигдөр сайн муу хоёр мэдээг бие биедээ өрсөн хүргэж байв. Сайн гэдэг нь “Шинэчилье” хөдөлгөөний залуусыг МАН-ын дарга асан М.Энхболд дэмжинэ гэж зарласан явдал. Муу гэдэг нь МАН-ын өөр нэгэн дарга Б.Даш-Ёндон ихээхэн ёжтой үгээр ангаахайнуудын цаг болоогүйг сануулсан юм. МАН-д одоо ч нөлөөгөө алдаагүй байгаа Б.Даш-Ёндон гуай “Намыг удирдаж байгаа хүмүүс намаа ангаахай, дэгдээхэйний үүр мэтээр бодож хаяад орхиж болохгүй ээ” гэж хэлсэн юм. Өөрөөр хэлбэл шинэчлэл хийнэ гэж зарлаад яваа залуусыг ангаахай дэгдээхэй гэж хэлсэн хэрэг.
 
Бас одоогийн удирдлагуудыг ажлаа өгөхийг дэмжсэн юм. Энэ байр суурийнхаа талаар “Хэрэв нөхцөл байдлаас шалтгаалан намын Удирдах зөвлөл огцроход хүрвэл дараагийн нөхөддөө суудлаа биш, намаа хүлээлгэж өгдөг байх ёстой. Энэ юу гэсэн үг вэ гэвэл, алдаа ололтоо дүгнэсэн дүнгээ түрүүчийн удирдлага нь дараагийнхдаа өгдөг болно гэсэн санаа. Түүнээс биш, зүгээр л нэг нь авъя гэхээр нөгөөх нь хэдэрлээд “тэгээ тэг” гээд байж болохгүй. Дарга, цэргийн хувьд солигдож, өөрчлөгдөж болноо, энэ бага хэрэг. Суудлаа өгч байх хэрэгтэй гэе л дээ, энэ бол зөв” гэсэн тайлбар хийсэн юм. Гэхдээ ажлаа өгөхдөө шинэчилье хэмээн зарлаад байгаа нөхөдүүдэд л биш шүү. Өөр тулхтай түшигтэй нэр цэвэр хүмүүст удирдлагаа шилжүүл гэж битүүгээр хэлсэн үг л дээ. Түүний энэ ёгт үгийг МАН-ын шинэчлэлийнх нь баатарууд тайлж уншиж чадах болов уу даа гэж ярих хүмүүс ч тааралдав.

МАН-ын түшиг тулгуур болж явдаг тэрээр хариуцлагаас мултарч шинэчилье хэмээн тунхаглаж, “Шинэчилье” хөдөлгөөн байгуулсанаа зарлаад яваа У.Хүрэлсүхийн залуусын зорилго мөн чанарыг ч хөндөж тайлбарласан юм. Тухайлбал “Үнэндээ “шинэчлэл” гэдэг үг өнөө үед үнэхээр утгагүй зүйл болж хуучирчээ. Монголчууд бид эргэж нураахаа л шинэчлэл гэж боддог болчихоод байна. Одоо ч манай Монголд, намуудад эрх мэдлийн төлөөх тэмцлээ “шинэчлэл” гэдэг үгээр халхалдаг болчихож дээ. Ухаандаа аль нэгэн намын удирдлагад горилсон хүмүүс хаана ч зөндөө л байдаг. Тэд санасандаа хүрэх гэж ямар нэгэн шалтаг хайж байдаг. Тэр гол шалтаг нь сонгуулийн дүн юм байна л даа. Сонгуулийн  дүн тааруухан гарчихвал энэ нь шалтаг болдог. Энэ шалтгаа олон түмэнд илэрхийлэхдээ “шинэчлэл” хийнэ гэдэг. Хараад байхад энэ нь удирдлагаа солино гэсэн үг юм байна л даа” хэмээн байр сууриа илэрхийлсэн юм. Залуусын үйлдэл ахмад удирдлагадаа ингэж ойлгогдож байгаа аж. Ард түмний нүдэнд энэнээс ч муухайгаар харагдаж яваа.
 
Үүнтэй зэрэгцээд өчигдөр хилийн чинадад ажиллаж амьдардаг МАН-ыг дэмжигч залуус нэгдэн “Шинэ хүч хөдөлгөөн”-ийг байгуулсанаа зарлав. Уг хөдөлгөөний үндэслэгчийн нэг Норвегийн шинжлэх ухааны их сургуулийн эрдэм шинжилгээний ажилтан М.Найданхүү “Намаа шинэчилье гэвэл юуны өмнө улс эх орны эрх ашгийг боддог, нэр цэвэр хүмүүсийг намын бүх түвшинд оруулж ирэх ёстой. Гэтэл сүүлийн таван сонгуульд дараалан ялагдахад гол үүрэг гүйцэтгэсэн нөхдүүд, тухайлбал, Н.Номтойбаяр, Ж.Мөнхбат, Л.Оюун-Эрдэнэ, У.Хүрэлсүхийн зөвлөхүүд гэх зэрэг олон нөхдүүд “Шинэчлэл” яриад эхэлж буй нь үнэнд үл нийцэх ичгүүртэй хэрэг. Уг нь эдгээр нөхдүүдийг огцруулах талаар ярих нь шударга юм. Гэтэл эд өөрсдөө манлайлан нэг баг болон ажиллаж байгаа, алдаж онож буй МАН-ын дарга, Ерөнхий нарийн бичгийн дарга, Удирдах зөвлөлөө огцруулах талаар ярьж байгаа нь дэндүү шударга бус, гутамшигтай хэрэг. МАН-ын ялагдалд гол үүрэг гүйцэтгэсэн хүмүүс шинэчлэлийн тухай ярьж байгаа нь үнэнд нийцэхгүй” гэж зарлав. Тэр бас У.Хүрэлсүхийн залуус гадаад ертөнцөд ингэж ойлгогддог гэж өгүүлсэн. Үнэхээр эдгээр залуус сүүлийн таван сонгууль дараалан намын удирдах түвшний ажил хийсэн хүмүүс. Тэгсэн мөртлөө намаа ялагдах болгонд бүгдээрээ нийлж олонхоороо түрээ барьж албандаа үлдээд байдаг. Энэ удаа ч гэсэн намаа ялагдсаны маргааш бүгд цуглан яаран сандран гарын үсэг цуглуулан хэвлэлийн хурал хийж байгаа нь сүйрч буй хөлөг онгоцноос амь гарах гэж зугтаж буй харх шиг л харагдсан.

Мөн Сангийн дэд сайд асан Ч.Ганхуяг “МАН-ыг шинэчилнэ гэх сургаар хамаг балаг таригчид шинэчилье, өөрчлөгдье гэж уриалан ярилцлага өгөөд ирэхлээр яалтай ч юм бэ дээ” гэж санааширсан юм. Үнэхээр ичих нүүргүй ийм залуусынхаа төлөө МАН-ынхнаас эхлээд эгэл жирийн гишүүд хүртэл гайхан санааширч байх шиг байна даа.