Монгол Улсын Ерөнхийлөгчөөр дахин сонгогдоод буй Ц.Элбэгдорж Эзэн Чингис хааны хөшөөний өмнө тангараг өргөлөө. Төрийн тэргүүн тангараг өргөхдөө “Монгол Улсын тусгаар тогтнол, бүрэн эрхт байдал, эрх чөлөө, үндэсний эв нэгдлийг дээдлэн хамгаалж Ерөнхийлөгчийн үүргийг шударгаар биелүүлэхээ батлан тангаргалъя” гэсэн юм.  Ингээд Монгол Улсын Ерөнхийлөгч Ц.Элбэгдоржийн бүрэн эрх албан ёсоор хэрэгжиж эхэллээ.

Монгол Улсын Ерөнхийлөгч ард түмэнд хандан хэлсэн үгэндээ “Надад дахин итгэл хүлээлгэсэн сонгогч олондоо чин сэтгэлээсээ талархая. Надад итгээгүй эргэлзсэн иргэдийнхээ итгэлийг олохын төлөө хичээн зүтгэнэ.

Төрийн түшээ хүн өөрийн жаргалыг умартаж бусдын жаргалыг бодох ёстой. Одоогоос 23 жилийн өмнө би энэ талбай дээр цэрэг шинелээ тайлаад хувьсгалд оролцсон.

Манай иргэн бүр эрхээ баталгаатай эдэлж чадсан нөхцөлд өөдлөн дэвжинэ, бүтээн байгуулалт амжилтад хүрнэ.

Бид ирэх дөрвөн жилд байгальд ээлтэй хямд эрчим хүч хэрэглэнэ. Монгол Улс өөрийн гэсэн шатахуунтай болно. Төмөр зам барина, бүх аймаг засмал замаар нийслэлтэй холбогдоно. Гэр хороололд дахин төлөвлөлт, бүтээн байгуулалт өрнөнө. Баг сумын төвүүд шинэчлэгдэж, шинэ хотууд бий болно.

Баялаг бүтээхэд оролцох иргэний оролцоо нэмэгдэж баталгаажина. Монгол Улсын иргэнийг мэндэлсэн цагаас авахуулаад ахмад настан болж амьдрах хүртэл нь төрөөс дэмжинэ. Оюутан залуус, залуу гэр бүл, ахмадууддаа дэмжлэг шаарддагатай иргэдээ дэмжинэ. Төрийн алба, Зэвсэгт хүчин, хууль хяналтын байгууллагад ажилладаг иргэдийнхээ нийгмийн асуудалд онцгой анхаарна. Үйлдвэр бүтээн байгуулалтад чиглэсэн хөрөнгө оруулалтыг тогтвортой бодлогоор дэмжинэ. Хуваагдлыг бус хийж бүтээхийг дэмжинэ. Баялаг бүтээгчдийг бүх боломжоор дэмжинэ. Би монголын ард түмний нийтлэг эрх ашиг, хөгжлийн эрх ашгийг хэсэг бүлгийн эрх ашгаас ямагт дээгүүр тавьж ажиллах болно. Би ядарч зүдэрч яваа иргэдээ онцгой анхаарна.Би Монгол Улсын иргэдээ баян ядуу, угсаа гарал, газар нутгаар нь үл ялгаварлан жигд төлөөлөн ажиллана” хэмээлээ.

Монгол Улсын Ерөнхийлөгч Ц.Элбэгдорж ард түмэндээ хандан үг хэлснээр Хүндэтгэлийн чуулган өндөрлөсөн юм.
Ерөнхийлөгч Ц.Элбэгдоржийн хэлсэн үгийг удахгүй бүрэн эхээр нь хүргэх болно.