Монгол улсын Ерөнхийлөгч Ц.Элбэгдорж өчигдөр Төрийн ордны өмнө тангараг хүргэсэн. Сонгуулийн ялалтын дараа түүнд дэлхийн томоохон орнуудын төрийн тэргүүнүүд баяр хүргэсэн билээ. Тэгвэл өчигдөр тангараг өргөх ёслолын дараа Ерөнхийлөгчид баяр хүргэсэн төрийн тэргүүнүүдийн мэндчилгээг хүргэе.

Эрхэмсэг ноён Цахиагийн Элбэгдорж танаа, Монгол Улсын Ерөнхийлөгчөөр дахин сонгогдсонд Тань чин сэтгэлээсээ баяр хүргэхийн сацуу таны тангараг өргөх ёслолын арга хэмжээнд өөрийн хамгийн их итгэл найдвар хүлээлгэдэг Гадаад бодлого, аюулгүй байдлын ахлах нарийн бичгийн дарга Жү Чол Ги-г илгээх болсондоо маш их баяртай байна.
 
Монгол Улс өнгөрсөн жилүүдэд Таны удирдлага дор бүхий л салбарт ахиц дэвшил гаргасаар ирсэн билээ. Ноён Ерөнхийлөгч Та цаашид ч Монголын ард түмний хүсэл эрмэлзэлд тулгуурлан Монгол Улсыг хөгжил цэцэглэлтийн зам руу удирдан авч явахыг хүсэн ерөөе.
Түүнчлэн, өнгөрсөн хугацаанд Солонгос-Монгол хоёр орны харилцааны хөгжилд онцгойлон анхаарал хандуулж байсанд тань талархал илэрхийлье. Миний зүгээс 1990 онд хоёр орны хооронд дипломат харилцаа тогтоосноос хойш цогцлоож ирсэн харилцаан дахь ололт амжилт, өнө эртний түүх соёлын хэлхээ холбоонд тулгуурлан “Солонгос-Монголын иж бүрэн түншлэлийн харилцаа”-г цаашид улам бэхжүүлэхийн төлөө Ерөнхийлөгч Тантай хамтран зүтгэхийг зорьж байна.
Танд эрүүл энх, аз жаргалыг, Монгол Улс үүрд хөгжин дэвжихийн өлзийтэй ерөөлийг өргөн дэвшүүлье.
 
ПАК ГЫН ХЭ
БҮГД НАЙРАМДАХ СОЛОНГОС УЛСЫН ЕРӨНХИЙЛӨГЧ
2013 оны 7 дугаар сар 10
 
Монгол Улсын Ерөнхийлөгч
Эрхэмсэг ноён Ерөнхийлөгч Ц.Элбэгдорж Танаа,
Өнгөрсөн долоо хоногт Монгол Улсын Ерөнхийлөгчөөр дахин сонгогдсонтой тань холбогдуулан чин сэтгэлийн баяр хүргэе. Манай хоёр орны харилцааг улам бүр бэхжүүлэхийн төлөө Тантай үргэлжлүүлэн хамтран ажиллах завшаан тохиосонд баяртай байна.
Танай Засгийн газар өмнөө дэвшүүлсэн шинэчлэлийн зорилтуудыг хэрэгжүүлэх явцад тодорхой амжилт гаргаж байна. Хамтын ажиллагааны чухал салбаруудад манай тал дорвитой дэмжлэг үзүүлж чадсан гэж найдаж байна. Хоёр орны хамтын ажиллагаа боловсрол, эрүүл мэндийн салбарт амжилттай хөгжиж байгаад сэтгэл хангалуун байна. Мөн Монгол Улсын Зэвсэгт хүчний жанжин штабын бие бүрэлдэхүүн Эдинбургийн Тату фестивальд оролцох болсныг баяртайгаар хүлээн авлаа. НҮБ-ын хүрээнд болон олон улсын бусад байгууллагын хүрээнд манай хоёр орны зэвсэгт хүчин дэлхийн олон оронд энхийг сахиулах үйл ажиллагаанд идэвхтэй үүрэг гүйцэтгэж байгааг бахархалтайгаар тэмдэглэж байна.
Манай хоёр талын худалдаа, эдийн засгийн хамтын ажиллагаа жилээс жилд улам нэмэгдэж байгааг өнгөрсөн 2 дугаар сард Танд бичсэн захидалдаа дурдсан билээ. Британий олон тооны компаниуд Монгол Улсад хөрөнгө оруулах сонирхлоо илэрхийлж байна. Улаанбаатар дахь Элчин сайдын яамаа бид өргөжүүлж, илүү их зөвлөмж, дэмжлэгээр хангахаар болсон. Лондон ситигийн захирагч Лорд Мэйрын ирэх 9 дүгээр сард Монгол Улсад хийх айлчлал нь Монголын санхүүгийн салбарын хөгжилд хувь нэмэр оруулах санал, санаачилгыг хоёр талаас гаргах нөхцөл бүрдүүлнэ гэдэгт итгэлтэй байна.
Үүний сацуу Оюу толгой төслийн ажлыг урагшлуулахад Таны дэмжлэгийг дахин хүсмээр байна. Энэ асуудлаар өнгөрөгч 2 дугаар сард би Танд захидал илгээж байсан боловч сүүлийн саруудад, тухайлбал, 6 дугаар сарын 21-нд төлөвлөгдсөн зэсийн баяжмалын анхны экспортыг хойшлуулсан зэрэг нэмэлт хүндрэл гарсан гэж ойлгосон. Энэ мэтийн үл ойлголцсон байдал нь хөрөнгө оруулалтын түншийн хувьд Монгол Улсын олон улсын нэр хүндийг бууруулах, Оюу Толгой төслийн цаашдын үйл ажиллагаа, хөгжил цэцэглэлд эргэлзээ төрүүлэх бодит эрсдэл дагуулна хэмээн үзэж байна. Тиймээс тулгарсан бэрхшээлийг даван туулж, Оюу Толгойн зэсийн баяжмалын экспортыг түргэн хугацаанд тогтвортой байдлаар эхлүүлнэ гэдэгт найдаж байна. Ингэснээр танай Засгийн газар, хөрөнгө оруулагчдын хооронд үүссэн Хөрөнгө оруулалтын гэрээний талаарх үндсэн зөрчилдөөнийг арилгаж, Төсөл санхүүжүүлэх багцыг төгсгөл болгоход тустай болох нь дамжиггүй. Энэхүү ажлыг зөв голдирлоор явуулахад Та бид нэгэн сэтгэлтэй байгаад эргэлзэхгүй байна.
Таныг улиран сонгогдсонд дахин баяр хүргэе. Манай хоёр орны хооронд дипломат харилцаа тогтоосны 50 жилийн ойн жилд Тантай өргөн хүрээнд хамтран ажиллахад бэлэн байгаагаа мэдэгдье.
Гүнээ хүндэтгэсэн,
Дэвид Камерон
Их Британийн Ерөнхий сайд

Монгол Улсын Ерөнхийлөгч Цахиагийн Элбэгдорж Ерөнхийлөгчийн тангараг өргөсөнтэй холбогдуулан ЗХУ-ын удирдагч асан Михаил Сергеевич Горбачёв өнөөдөр утсаар баяр хүргэлээ.
Михаил Горбачёв Монголд ардчилсан нийгмийг амжилттай цогцлоож, улс орныхоо нэрийг дэлхий дахинд цуурайтуулж буй Монгол Улсын Ерөнхийлөгчид баяр хүргээд цаашдын ажилд нь амжилт хүсэв.

Эрхэм хүндэт Ерөнхийлөгч өө,
Монгол Улсын Ерөнхийлөгчөөр дахин сонгогдсон Тань чин сэтгэлийн баяр хүргэе.Энэтхэгийн ард түмэн, Засгийн газрын нэрийн өмнөөс Таны цаашдын ажил үйлсэд өндөр амжилт хүсэн ерөөе.
 
Монгол Энэтхэгийн ард түмэн соёл иргэншил, урлаг соёл болон шашин шүтлэгийн хувьд холбоотой хүмүүс. Таныг Ерөнхийлөгчөөр ажиллах хугацаанд манай хоёр улс Олон талт хамтын ажиллагааг өргөжүүлж чадсан. Бидний хамтын ажиллагаа тасралтгүй хөгжиж, шинэ чиглэл салбарт өргөжсөөр байна. Мөн манай хоёр улсын эдийн засаг, худалдааны харилцаа цаашид өргөжих хандлагатай байгаад би сэтгэл хангалуун байдаг.
Таны алсын хараа, үүрэг оролцоотой Монгол Энэтхэгийн харилцаа ойрын жилүүдэд улам илүү эрчимтэй хөгжинө гэдэгт итгэлтэй байна. Та цаашид Ерөнхийлөгчөөр ажиллах хугацаандаа хоёр улсын ард иргэдийн ашиг тусын төлөө Олон талт хамтын ажиллагааг улам бүр хөгжүүлнэ гэдэгт итгэж байна.
Таныг Шинэ Дели хотод айлчлан ирж, хоёр улсын харилцаа хамтын ажиллагааг өргөжүүлэх асуудлаар ярилцахыг урьж байна.
Эрхэм Ерөнхийлөгч танд эрүүл энх, аз жаргал, хамгийн сайн сайхан бүхнийг хүсэн ерөөж байгааг минь хүлээн авна уу.
 
Хүндэтгэсэн
Пранаб Кумар Мукержи
Бүгд Найрамдах Энэтхэг улсын Ерөнхийлөгч

Эрхэм хүндэт Ерөнхийлөгч өө,
Монгол Улсын Ерөнхийлөгчөөр дахин сонгогдсон Тань чин сэтгэлийн баяр хүргэе.
Таны манлайлал, удирлага дор Монгол Улс богино хугацаанд дэлхийн хамгийн хурдацтай хөгжиж буй орнуудын нэг болсон билээ.
Таныг Ерөнхийлөгчөөр ажиллах хугацаанд Монгол Сингапур улс найрсаг дотно харилцаатай байсан ба олон салбарт хамтран ажиллаж ирсэн. Бид энэ харилцааг цаашид бэхжүүлэн хөгжүүлэх хүсэлтэйгээ илэрхийлэхийн ялдамд тохиромжтой цагтаа Сингапурт айлчлахыг урьж байна.
Танд болон Монголын ард түмэнд эрүүл энх, аз жаргалыг хүсэн ерөөе.
 
Хүндэтгэсэн
Тони Тан Кенг Яам
Бүгд Найрамдах Сингапур улсын Ерөнхийлөгч

Эрхэмсэг ноён Ерөнхийлөгч өө,
Таныг төрийн нэн өндөр албанд дахин сонгогдсонтой холбогдуулан чин сэтгэлийн мэндчилгээ дэвшүүлэхийн ялдамд улс орноо ардчилал, хөгжлийн замаар үргэлжлүүлэн хөгжүүлэх үйлсэд Тань амжилт хүсье.
 
Монгол Улс нь Франц Улсын Ази дахь онцолсон түнш юм. Танай улсын дотоод улс төрийн хөгжил, нэн ялангуяа цаазаар авах ялыг цуцлах тухай Таны зоримог шийдвэр зэрэг нь бүс нутагтаа үлгэр дуурайлал болох үнэ цэнэтэй алхам болсон хэмээн үзэж байна. Манай хоёр талын харилцааг улс төр, эдийн засгийн салбарт улам бүр эрчимжүүлэн хөгжүүлэхэд Таны дэмжлэгийг авч ажиллана гэдэгт итгэл төгс байна.
Өнгөрсөн 10 дугаар сард Лаос Улсад болсон АСЕМ-ын төр, засгийн тэргүүн нарын дээд хэмжээний уулзалтын үеэр Тантай уулзсанаа эргэн санахад таатай байна. Түүнчлэн ойрын хугацаанд Таныг Парис хотноо хүлээн авах болсондоо сэтгэл хангалуун байна.
Энэ айлчлалыг хэрэгжүүлэх эрмэлзлээ илэрхийлэхийн ялдамд Эрхэмсэг ноён Ерөнхийлөгч Танд өндөр хүндэтгэл илэрхийлье.
 
Хүндэтгэсэн,
Франсуа Олланд
Бүгд Найрамдах Франц Улсын Ерөнхийлөгч