Сонгинохайрхан дүүргийн МАХН-ын Хяналт ёс зүйн дэд хорооноос сэтгүүлчдэд мэдээлэл хийлээ. Тэд “Шадар сайд Д.Тэрбишдагва, МАХН-ын Ерөнхий нарийн бичгийн дарга Г.Шийлэгдамба нар маш хариуцлагагүй хандаж, хууль ёсыг сахиулахын төлөө бус ойлгомжгүй, тогтворгүй байдал үүсгэж байна. Өнөөдрийн байдлаар Сонгинохайрхан дүүргийн МАХН хоёр болж хуваагдаад байна. Нэг нь Сонгинохайрхан дүүргийн МАХН-ын хороо, нөгөө нь Сонгинохайрхан дүүргийн МАХН-ын мянгатын хороо гэсэн намын байгууллагатай болсон. Бид асуудлыг тухай бүрт тавьж, нэг тийш нь шийдэж өгөх хүсэлтийг тавьж ирсэн. Гэтэл асуудлыг өнөөдрийг хүртэл нэг тийш болгосонгүй. Түүгээр ч үл барам Сонгинохайрхан дүүргийн Мянгатын хорооны дарга Мөнгөнчимэгийг намаас хөөх шийдвэр гаргасан байгаа. Мөнгөнчимэг нь Сонгинохайрхан дүүргийн АН-ын дарга Г.Эрхэмбаяртай уулзаж 10 орчим хүнийг ажилтай болгох талаар ярилцсаныг нь ёс зүйд нийцэхгүй зүйл гэж үзсэн байдаг.

Гэтэл өнөөдөр МАХН-д Д.Тэрбишдагвыг дагаж, МАН-аас ирсэн маш олон хүнээр дүүрсэн. Тэд нь МАХН–ыг хагалган буталгах ажиллагаа явуулдаг. Харин Д.Тэрбишдагва тэр хүмүүсээ ямагт дэмжиж, ажил албанд татдаг. Жишээ татвал, МАН-аас хөөгдөж ирсэн н.Нэргүй, н.Ганболд нарыг орон нутгийн сонгуульд нэр дэвшүүлсэн. Бүгд сонгуульд ялагдсан, дараа нь хорооны даргын сонгуульд нэр дэвшүүлсэн, бас л унасан. Эцэст нь Д.Тэрбишдагва ажилд томилсон байна лээ. Энэ бүх асуудлыг цэгцэлж МАХН-ын ээлжит бус чуулганыг зарлан хуралдуулахыг шаардаж байна” гэв.