Н.Удвал хэвлэлийн хурал хийж намын даргынхаа өвчнийг ард иргэдэд уламжлав. Түүний хэлж байгаагаар Н.Энхбаярын биеийн байдал дордсоор тун хүнд байдалд ороод байгаа гэнэ. Жин хаяж, нойргүйдэж, хоолны дуршилгүй болж, сэтгэл санааны хүнд байдалд гэх оношийг Н.Энхбаярт тавьсаар. Түүнийг эмчлэгч эмч нар эрүүл мэндийн байдлаас шалгаалан ялаас чөлөөлөх хүсэлтийг өнгөрсөн дөрөвдүгээр сард тавьсан. Гэвч долоон сар болчихоод байх одоо хүртэл хариу ирээгүй байгааг Н.Удвал сайд онцлов. Мөн Эрүүл мэндийн сайд Н.Энхбаярыг гэрт нь гаргаж эмчлүүлэх талаар ч цухас дурдсан юм.

Чухам Н.Удвалыг ийнхүү мэдээлэл хийсэнд хүмүүс нээх гайхсангүй. Учир нь тэрбээр өмнө нь ч яг л энэ оношуудаа дэвшүүлсээр байсан. Гагцхүү олон түмэн түүний ийн яаран сандран хэвлэлийн хурал хийснийг өөр олон янзаар ойлгож байгаа юм. Зарим нь  Н.Энхбаярын төрийн тусгай хамгаалалт буусантай холбоотой гэж байгаа бол нөгөө хэсэг нь  АН-тай хийсэн тохироо хөтөлбөрийнхөө дагуу явагдаад байна уу гэж таамаглаж байна.  Учир нь Ц.Элбэгдорж Ерөнхийлөгч болмогцоо Н.Энхбаярт өршөөл үзүүлж суллах байх гэж яригдаж байсан ч тангараг өргөх ёслол, наадмын өдрүүдтэй зэрэгцээд тус асуудал түр хойшлогдсон гэнэ.

Намын даргыг суллахгүй бол МАХН-ы зүгээс засгийг унагах гээд байна уу эсвэл даргыг нь суллавал Засгийн унагахад туслах гээд байна уу гэсэн олон түмний яриа жиг жуг хийсээр байна.

Нөгөө талаас МАХН дотроо маш их хагаралтай байгаа. Сонгинохайрхан дүүргийн МАХН-ын Хяналт ёс зүйн дэд хорооноос бас л мэдээлэл хийсэн. Тэд “Шадар сайд Д.Тэрбишдагва, МАХН-ын Ерөнхий нарийн бичгийн дарга Г.Шийлэгдамба нарын  хариуцлагагүй үйлдэл, албан тушаалаа урвуулан ашигласан зүйлсийг тоочиж нам доторх талцлыг үүсгээд байгааг ч дурдав. Яг үнэндээ тэдний хэлээд байгаа ч үнэний үндэстэй. Өнөөдрийн байдлаар л гэхэд Сонгинохайрхан дүүргийн МАХН хоёр болж хуваагдаад байгааг олон хүн гэрчилнэ.

Энэ мэтээр дотроо хагаралтай байгаа МАХН-ынхан асуудлаа хэрхэн шийдвэрлэх нь хэсэг хугацааны дараа тодорхой болох биз ээ. Ямартаа ч эднийг хоёр өөр байр суурьтай болоход Н.Энхбаяр гэдэг ганц л хүчин зүйл нөлөөлж байгаа. МАХН-ы сайд нарын суудалдаа үлдэх үгүй нь  Н.Энхбаяр гэдэг ганц хүнээс шалтгаална. Гэхдээ хэн ч өнөөдөр өндөр албан тушаалаасаа холдох бодолгүй байгаа юм. Харин намын "жирийн" гишүүд ямар ч аргаар хамаагүй намын даргаа суллахаар тэмцэж байгаа нь өчигдрийн хурлаас харагдаж байлаа.