Өчигдөр МАХН-ын дарга Н.Энхбаярын гэрт болон худынд нь АТГ-аас гэнэтийн нэгжлэг хийж шуугиан тарьлаа. Хамгийн гол нь Н.Энхбаярын хамгаалалт буусны дараа гэрт нь шалгалт хийсэн нь эртнээс бэлдэж байсан зүйл гэдгийг илтгэх юм. Учир нь хамгаалалтын хугацаанд түүний гэр халдашгүй дархан эрхтэй байдаг хуультай. Ямартаа ч Н.Энхбаярын хамгаалалт буунгуут АТГ-ынхан нэгжлэг хийх ажлаа эхлүүлсэн юм.

Ингэхдээ Н.Энхбаярын гэрийн эд хөрөнгийг битүүмжлээд зогсохгүй хүү Э.Батшугарын хадам болох С.Төмөрийн гэрт нэвтэрч зарим нэг эд хөрөнгийг нь битүүмжилж, гэрийг нь лацадсан. Мөн Н.Энхбаярын эхнэр О.Цолмонгоос мэдүүлэг авч, дүүг нь баривчлан саатуулсан билээ. Чухам АТГ-ын энэ бүх үйлдэл Т.Билэгтийн өгч буй мэдүүлгээс үүдэлтэй гэж зарим хүмүүс үзэж байгаа бол нөгөө хэсэг нь  Н.Энхбаярын улсад учруулсан хохирлыг нь барагдуулах гэж байгаатай холбон тайлбарлаж байна.
Өчигдрийн нэгжлэг шалгалтын үед МАХН-ын зарим гишүүд ирсэн ч удирдлагууд нь тэр дундаа даргынхаа төлөө “мятрашгүй” тэмцдэг Эрүүл мэндийн яамны сайд Н.Удвал ирээгүй. Харин энэ бүх үйлдлийн эсрэг зогссон ээжүүдийн төлөөлөл  цугласан байв.  Орой 18:00 цагийн орчимд З.Баянсэлэнгэ гишүүн ирсэн бол түүний дараахан Хууль зүйн дэд сайд Э.Эрдэнэжамъян ирж гражаар нь нэвтрэн орохыг оролдсон ч хүчнийхэн оруулаагүй юм.
Экс тэргүүн хатагтай О.Цолмонгийн эгчийн хүүг баривчилсан хийгээд Э.Батшугарын хадмын гэрийг лацдаж, эд хөрөнгийг нь битүүмжилсэн нь юу юунаас илүүтэй хүмүүсийн сонирхолыг  татаж байгаа билээ. О.Цолмонгийн эгчийн хүүгийн хувьд бүр  хөлөө гэмтээчихсэн гэртээ эмчлүүлж байхад нь ийн саатуулахаар авч явжээ.  Мөн худынд  худал хэлж орж нэгжлэг хийж, эд хөрөнгийг нь битүүмжилсэн юм.

АТГ-ынхан үдшийн бүрий болтол Н.Энхбаярын гэрийн үүдийг хэд хэдэн цагдаагаар мануулж, эхнэр О.Цолмонгоос нь мэдүүлэг авлаа. Мөн эхнэр О.Цолмонг гражаар нь авч гарч баривчлан саатуулахыг оролдсон талаар тэнд байсан зарим эх сурвалжууд хэлж байв. Ямартаа ч Н.Энхбаярын хамгаалалтыг буулгасны дараа эхнэр О.Цолмонг нь баривчлахаар төлөвлөсөн байсан уу гэх таамаг ч олны дунд төрөөд байна.
Хэдхэн хоногийн өмнө л Эрүүл мэндийн сайд нь “Бие нь тун муу байна, ялаас яаралтай чөлөөлөөд өгөөч” хэмээн гуйж байсан экс ерөнхийлөгч Н.Энхбаярын гэрт чухам яагаад нэгжлэг хийх болсон, мөн хамаатан саданг нь юуны учир шалгах болсон шалтгаанаа хуулийн байгууллагуудаас одоогоор тодорхой тайлбарыг өгөөгүй байгаа юм.