Манай улсад цана чаргаар гулгадаг газар цөөхөн. Тоотой хэдхэн газрыг иргэд маань зорьж, өөрсдийгөө болоод хүүхэд, хөгшдөө баярлуулж агаар салхинд гарч стрессээ тайлдаг.

Мэдээж өвлийн улирлын бас нэгэн “өнгө” нь цас, цана, чарга. Тиймээс ч жилийн дөрвөн улирлын нэгдээ хүмүүс ганц өдөр ч болов агаарт гарч цана, чаргаар гулгах сонирхолтой байдаг. Гэтэл найдвартай, үйл ажиллагаа нь сайн, иргэдийг хохироочхооргүй цанын бааз бараг байхгүй.
“Скай ресорт”, “Хандгайт” гэсэн хоёр газарлуу л зүглэх хүмүүс олон. Харамсалтай нь энэ хоёр газар тэс өөр үйлчилгээтэй бөгөөд үнийн хувьд харьцангуй өөр. Тодруулбал, “Скай ресорт”-ын үнэ өртөг хэтэрхий өндөр, үйлчилгээ сайтай байхад “Хандгайт”-д чарганы гэх хэдэн төгрөгийг тушаадгаараа ялгаатай.

Тиймээс ч өндөр өртөгтэй цанын баазыг сонгож чадахгүй иргэд олон байдгийг нуух юун. Гэр бүлийнхэнтэйгээ, найз нөхөдтэйгээ, анги хамт олноороо цана чаргаар гулгаж өдрийг сайхан өнгөрөөх зорилготой хүмүүс л эдгээр газрыг зорьж байгаа. Харамсалтай нь тэд нулимастай буцах тохиолдол буурахгүй байгааг энд тодотгохоор шийдлээ.

Бидний хэсэг нөхөд жил бүр Хандгайтыг зорьж, цана чаргаар гулгадаг болоод удаж байна. Гэвч жилдээ ганц очих тэр өдөр тухайн газар заавал нэг эмгэнэл, заавал нэг бэрхшээл гарч ирдэгийг энд онцлох нь зүйтэй биз ээ. Магадгүй биднийг очих бүрт болдог бэртэл гэмтэл, хүний амь үрэгдэх явдал олон нийтийн бодож байгаагаас ч их гарч байгааг үгүйсгэхгүй юм.

  Өнгөрсөн жил л гэхэд 20 гарч яваа залуу, бяцхан хүүхдийн хамт хүнд гэмтэн хүмүүсээр өргүүлэн эмнэлгийн бараа харж байсныг тод санаж байна. Гэвч энэ жил бэртэл гэмтэл нь хүний амиар солигдож байгаа нь хамарсалтай.
Золгүй явдлаар амиа алдсан иргэн хийгээд түүний хөөрхийлөлтэй охин, тэднийг гэр бүлийг хараад олон нийтэд сэрэмжлүүлэх үүднээс тэнд болсон явдлыг дор сийрүүлье.

Тэнд хүн үхчихлээ, энд хүн нас барчихаж гэсэн яриа жиг жуг хийсээр байв. Ам, хамарнаас нь цус гараад нас барчихлаа гээд л үнэхээр айдастай зүйл сонсогдож эхлэв. Энэ өдөр Нэгдүгээр сарын 2-н байв.  Бидний нөхөд энэхүү харамсалтай мэдээллийн мөрөөр хэргийн газар очиход 60 орчим насны эрэгтэй амиа алдсан, эргэн тойронд нь эргүүлийн цагдаа нар, мөн гашуудсан ар гэрийнхний дүр зураг харагдав. Үнэхээр сэтгэл эмтлэм энэ байдал харахаас нүд халтирам байсан нь лавтай. Хамгийн гол нь эцгийгээ агаарт авч гарч, ганц өдөр ч болов хөгжилдөхөөр шийдсэн охидын амьдрал тэр цаг мөчид харанхуй, аймшигтай, итгэмээргүй байсан гэхээр үнэхээр сэтгэл эмтэрмээр байлаа.

  Ингээд юу болсныг асуувал дээрээс гулгаж байсан 14,15 орчим насны хоёр хүү замд нь  зогсож байсан нэгэн настай хүнийг дайран унагааснаас тэр хүний хамар, ам, чихнээс нь зэрэг, зэрэг цус гарч эхэлсэн байна. Тэр даруйд түргэн тусламж дуудсан ч замын урт, Хандгайтын орчим дахь замын түгжрэлээс болж тухайн  хүний амийг аварч чадаагүй аж. 103-ын эмч нар ирэхэд аль хэдийнэ оройтсон байсан бөгөөд эмч нар шүүх эмнэлгийнхэнийг иртэл хөдөлгөж болохгүй гэдгийг сануулаад буцаад явсан юм. Үүнээс хойш цаг гаруйн дараа Шүүх эмнэлгийнхэн ирж талийгаачийн цогцосыг авч явсан юм.
Түргэн тусламж, шүүх эмнэлгийнхэн ирээд талийгаачийн цогцосыг аваад явах хүртэл түүний хүүхдүүд нь бололтой 4-5 хүн хажуунаас нь ахлам ч холдохгүй өөрсдийн өмсөж явсан гадуур хувцасаа тайлан хучиж, талийгаач эцгийгээ тэврэн уйлж суусан юм.
Харин талийгаачийг үхэлд хүргэсэн гэх насанд хүрээгүй хоёр хүүхдийг цагдаа нар гавлан авч явсан юм. Мэдээж тэд хүний аминд хүрсэн учир тэдэнд эрүүгийн хэрэг үүсгэнэ. Гэвч тэднийг буруутгах нь зөв ч юм уу?. Тэд бас л тоглож наадах гэж, амрах гэж ирсэн шүү дээ гэж бодогдох сэтгэл өөрийн эрхгүй төрж байв. Нөгөөтэйгүүр энэ хүүхдүүдийн амьдралд тоглож наадаж яваад хүний аминд хүрсэн гэх арилашгүй толбо үлдэж байгаа нь харамсалтай. Ийн аль, аль талдаа харамсмаар уг үйл явдал Хандгайтад ирэх он жилүүдэд дахин бүү давтагдаасай даа.
Ийм аюултай, хүний амь нас эрсдэх өндөр магадлалтай газар чарга зарж мөнгө олохыг л урьтал болгосноос биш хэн нэгэн гэмтэж бэртвэл анхан шатны тусламж үзүүлэх ямар ч бэлтгэлгүй, эмчгүй цанын бааз ажиллуулж байгаа хүмүүст хариуцлага хүлээлгэх, хяналт тавих газар байна уу. Тэнд ажиллаж байсан Сүхбаатар дүүргийн цагдаагийн газрын эх сурвалжийн хэлж буйгаар Хандгайтад ингэж цанын бааз ажиллуулах ямар ч зөвшөөрөл байхгүй аж. Мөн энэ байдлаа таслан зогсоох, чарга худалдахгүй байхыг удаа дараа сануулсан ч өдийг хүртэл хүлээж авахгүй байсаар ирсэн гэж байв.

Тэд нэг чаргаа 5000 төгрөгөөр түрээсэлдэг. Өдөрт хэдэн арван хүн тэднийхээр үйлчлүүлдэг. Тэгэхээр олж байгаа ашигаасаа тухайн газрыг зорьж буй хүмүүсрүү чиглүүлсэн зүйл хийвэл аштай юу даа. Адаглаад хүн бэртэж гэмтэхээс хамгаалсан зүйлс, анхан шатны тусламж үзүүлэх эмч зэргийг бэлтгэвэл болохгүй зүйл гэж байхгүй шүү дээ.